بھلا عئید آ ڈیوالئی تیان کورونانا تالانی نا گڑتی ساڑی ءِ، عمران خان

اسلام آباد (اے پی پی) وزیراعظم عمران خان قوم آن بھلاعئید ءِ سادہ ئی اٹ کننگ نا خواست کرسا داوخت آ ایس او پی تیا عملدرآمد کننگ آ زور شاغانے۔ بھلا عئید آ ڈیوالئی تیان کورونانا تالانی نا گڑتی ساڑی ءِ، نن ہموملک آتیٹی اوار اُن ہراڑے کورونا نا دین نا ترندی کم مننگ ءِ، اگہ نن رکھی گام گیج کرین تو دنیا غان چَپ دا خواری نا حالیت آتیان جوان وڑاٹ پیش تمنہ۔ داخیال آتا درشانی ءِ او پنچ شنبے نادے آ بنجائی دارالحکومت اٹ آئسولیشن ہسپتال و دین آتا درمان نا پوسکن آ ہند انا بناءِ کننگ نا وخت آ کرے۔ داوخت آ بنجائی وزیر ڈٹ بندی، شونداری و اصلاحات اسد عمر، بنجائی وزیر حوالکاری وشینکاری سینیٹر شبلی فراز، آرمی چیف جنرل قمر جاوید باجوہ، چین نا پاکستان اٹی متعین سفیر و بڑزکو ایلو کمامدارآک ہم ساڑی ئسر۔ وزیراعظم عمران خان پارے کہ کورونا دین و لاک ڈاون نا خوار کروک آ حالیت آتیان پد ہم چنکو وخت اسے ٹی پوسکن ءُ ہسپتال اس جوڑ کننگ آ این ڈی ایم اے ءِ مچ آ قوم انا کنڈآن خراج تحسین پیش کیوہ۔ دا ہسپتال اٹی کٹ، عملہ تون اوارغٹ پوسکن آ آسراتیک اریر۔ اوپارے کہ الس نا کنڈآن چنکا عئید ا لاپرواہی نا درشانی ءِ کننگاسس ہرانا سوب آن کورونا ترندی اٹ تالان مس، ہسپتال، فرنٹ لین ورکرڈاکٹرنرس آتیا دباوودا، مرک آتے ٹی ودکی مس۔ اوپارے کہ حکومت کوروناناتوننگکن لاک ڈاون خلک، این سی او سی پارت جاری کرے ہراڑا عملدرآمد کن صوبائی حکومت آک کمک کریر ہرانا سوب جولائی ٹی دین انا شدت نناگمان آن کم ئس۔