شونداری ڈٹ آتیٹی ڈیوالئی تے ہچ گہس سگپنہ ‘جام کمال خان

کوئٹہ ( آن لائن )وزیراعلیٰ بلوچستان جام کمال خان پارینے کہ شونداری ڈٹ آتیٹی ڈیوالئی ہچ ءُ گہس سگپنہ، شونداری کاریمک آب اٹ متوس تو ٹھیکیدار ءِ بلیک لسٹ ،ایکسین و انجینئر ءِ معطل کننگک، دا وخت اسکان 36ایکسین و 80انجینئر تے معطل کننگانے، ڈیوالئی تے اسہ کُنڈ کننگ مالو نا بشخ اس جوڑ مسنے، داسہ ہر ڈٹ انا تینٹ جاچ ءِ ہلیوہ، شونداری کاریم ٹی اگہ ڈیوالئی اس خننگا تو ہمو روڈ ءِ پرغنگ نا پیسہ غاتے ہم اوڑان ہلنگک۔ دا خیال آتا درشانی ءِ او تدوک آ دے میڈیا تون ہیت وگپ کرسا کرے۔ وزیراعلی بلوچستان شونداری کاریم تا آب انا بابت ہیت کرس کاریم تا زموار آ کمامدار آتیا اُست ہسونی نا درشانی ءِ کرے۔ او پارینے کہ شونداری کاریم تیٹی ہچ ءُ ڈیوالئی اس سگپنہ۔ وخت اس کہ روڈ آتا جوڑ کننگ آب انا رداٹ متو تو ٹھیکیدار ءِ بلیک لسٹ و ہمو ایکسین و انجینئر ءِ معطل کننگک، وزیراعلیٰ جام کمال پارینے کہ شونداری کاریم تیٹی ڈیوالئی آ دا وخت اسکان 36 ایکسین و80 انجینئر ءِ معطل کننگانے مالو شونداری ڈٹ آتیٹی ڈیوالئی مرسا کرینے ولے داسہ ڈیوالئی تے اینگ کننگ مالو نا وخت انا بشخ اس جوڑ مسنے۔ تینٹ ہر ڈٹ انا شونداری کاریم نا جاچ ءِ ہلسا کننگ اُٹ کنے آن بیدس سیکرٹری سی اینڈ ڈبلیو ہم تینٹ شونداری کاریم تا نگرانی ءِ کیک۔ او پارینے کہ اینخوبجٹ اٹ 2ہزار کلو میٹر آن زیات روڈ آتا ڈٹ آک اوار ءُ، او پارینے کہ شونداری کاریم تیٹی اگہ ڈیوالئی اس خننگا تو روڈ ءِ پرغنگ نا پیسہ غاتے ہم اوڑان وصول کننگک۔ اُلس تون کروک آ وعدہ غاتا پوروی المی ءِ۔ اگہ نن کاریم تیٹی نزوری کرین تو اُلس ءِ ریلیف تننگ کپنہ۔ وخت اس کہ وزیراعلیٰ بلوچستان جام کمال نواں کلی بائی پاس ہنہ روڈ نا جوڑ کننگ اٹ خراب ءُ میٹریل کاریم اٹ اتنگ آ اُست ہسونی نا درشانی ءِ کرسا پارینے کہ روڈ انا جوڑ کننگ نا تھرڈ پارٹی انسپکشن کیک۔ روڈ نا جوڑ کروک آ ٹھیکے دار تون بحث کرسا وزیراعلیٰ بلوچستان پارینے کہ دہن مف کہ نے دا ڈٹ آن معطل کرسا ولدا کاریم ءِ کننگ نا پاننگے۔ تدوک آ دے وزیراعلیٰ بلوچستان جام کمال خان نواں کلی بائی پاس ہنہ روڈ نا جاچ ءِ ہلک او وخت اس کہ روڈ انا جوڑ کننگ اٹ خراب ءُ میٹریل کاریم اٹ اتنگ آ وزیراعلی بلوچستان اُست ہسونی نا درشانی ءِ کرے۔ جام کمال خان روڈ انا جوڑ کروک آ ٹھیکہ دار آ ترند مرسا اودے پارے دا روڈ انا جوڑی ٹی اُلس نا پیسہ غاک لگنگ ءُ نے ہچ ءُ احساس اس اف نی دا سمجھپیس کہ کنے ہچ سما اف۔ او پارینے کہ روڈ اتون اوار ڈرین نا کاریم ہم بھاز خراب میٹریل و غیر زمواری ٹی کننگ انگ ءِ۔ دہن مف کہ نے دا ڈٹ آن معطل کرسا ولدا کاریم کننگ نا بنا ءِ کروئی تمپ۔ او پڑو کرے کہ روڈ انا جوڑی نا تھرڈ پارٹی انسپکشن ہم کرفوہ کل ءِ ڈٹ آتے ہرسا بننگ اُٹ نم کنے بے وقوف جوڑ کپبو۔