بے گوا تا بابت سردار اختر مینگل نا پاروک آ کچ پک اف، میر ضیاءلانگو

کوئٹہ ( آن لائن )صوبائی وزیر داخلہ میر ضیاءاللہ لانگو پارینے کہ اوغانستان تون سیم انا بند مننگ نا سوب آن دہشتگردی نا واقعہ غاتیٹی بھلو کچ اسے ٹی کمتی بسنے، دہشتگرد آک چمن نا کسر اٹ پاکستان آ بسُرہ۔ ہندا سوب آن داسہ چمن سیم آ ہننگ بننگ نا وڑ و ڈول ءِ بدل کننگ انگ ءِ۔ پاکستان اٹ دہشتگردی نا واقعہ غاتیٹی بھارت نا ڈائریکٹ دو ارے،وخت اس کہ بھارت ءِ اوغانستان تینا ڈیہہ ءِ کاریم اٹ اتنگ کن تننگ ءِ۔ سرداراخترجان مینگل نا بے گوا تا بابت پاروک آ کچ نہ تو اوفتا خاہوت او نہ انسانی حقوق کمیشن تون ءِ۔ ای سمجھوہ اونا پاروک آ کچ پک اف۔ دا خیال آتا درشانی ءِ او عرب در ملکی نشریاتی ادارہ ءِ تروک آ خصوصی آ انٹرویو ٹی کرے۔ میر ضیاءاللہ لانگو پارینے کہ کورونا وائرس نا سوب آن اوغانستان تون اوار ایلو ملک آتون سیم تا بند مننگ آن پد امن و ایمنی تون اوار ایلو پلو آتا جاچ ءِ ہلنگ نا دیوانک مرسا ءُ۔ ‘امن و ایمنی نا حالیت نا جاچ انا وخت آ دا سما تما کہ دہشتگردی نا شرح ٹی بھلو کچ اسسکان کمتی بسنے، صوبائی وزیر داخلہ پارینے کہ پین جاست و پاست کرین تو مالو نا ریکارڈ آتے ہم ہران ننے سما تما کہ دہشتگرد آتا چمن نا کسر اٹ بننگ بھاز زیات ئس۔ نن بھاز ہندن ءُ دہشتگرد ہلکونن ہرافک ہندا کسر اٹ بسونو۔ ہندا سوب آن داسہ پاک اوغان چمن سیم آ پند اٹ ہنوک آتا وڑ و ڈول ءِ بدل کننگ انگ ءِ۔ او مستی پارینے کہ پاک اوغان چمن سیم آ داسہ مالو آمبار آجوئی ٹی ہننگ بننگ ممکن اف۔ ہننگ بننگ نا کانود آتیا عمل کروئی تمک۔ مالو نا وڑ پورا سیم ءِ ملنگ ریاست و ریاستی ادارہ غاتے کن ویل اسے۔ ‘فورس آتا ویل آتےا ہم نظر شاغنہ او سیم انا بندی، پند اٹ ہننگ بننگ نا وڑوڈول نا بدلی آن زہمی و بے روزگار مروک آتے آسراتی تننگک۔ ضیا لانگو مستی پارینے کہ زہمی بندغ آتے حکومت احساس پروگرام نا رداٹ کمک نا آفر تسنے۔ نن اوفتے پارینن تانکہ نم کن روزگار اس بنا کتنن او وخت اسکان نمے 30 ہزار روپئی ہر تو آ ایتنہ۔ ارٹمیکو نن اوفتے دا آفر ءِ کرین کہ نن نمے ایف سی ٹی ڈیوٹی ایتنہ۔ نن اوفتے دا آفر ءِ ہم کرین کہ بارڈر آ ہرا باڑ ءِ خلنگ اُن اونا کاریم اٹ نن نمے مزوری آ خلینہ۔ نن نمے روزگار اس ایتنہ اوکان گڈ فیصلہ کینہ۔