تینا دنگ آتے کس انا رخلاف کاریم اٹ اتنگ کن الیپنہ، امیر متقی

ننا خارجہ پالیسی مذاکرات و کمک آ تالان ءِ‘ پاکستان تون واپاری راہداری‘ اقتصادی‘ کاروباری تعلقداری تا ودفنگ ءِ اولیت ایتنہ

0

Get real time updates directly on you device, subscribe now.

اسلام آباد : اوغان عبوری وزیر خارجہ مولوی امیر خان متقی پارینے کہ پاک، چین، اوغان سَے فریقی دیوان اٹ پک کننگا کہ کس ہم اسٹ ایلو نابرخلاف ڈغاری یا فضائی دنگ کاریم اٹ اتنگ کن الیپک‘ ننا خارجہ پالیسی مذاکرات و کمک آ تالان ءِ‘ پاکستان تون واپاری راہداری‘ اقتصادی‘ کاروباری تعلقداری تا ودفنگ ءِ اولیت ایتنہ۔ پاکستان و اوغانستان ءِ بھاز بھلو سیاسی وسکیورٹی چیلنج مون تروک ءِ‘ اوغانستان اٹ دہشت گرد پڑک آتا ساڑی مننگ نا ہنداخس غوغا مس کہ داسہ ہر اسٹ داڑا باور کننگ اٹی ءِ۔ اوغانستان نا 9 ارب ڈالر منجمد ءُ ہرا بایدے پدی تننگر‘ پاکستانی حکومت و ٹی ٹی پی آن خواست ءِ کہ او اسیجا تولر وہیت وگپ اٹ ویل آتے ایسر کیر۔ مرکز برائے اوغانستان، نیامئی دے ٹک و افریقہ نا کنڈآن مذاکرہ ور ادارہ برائے تذویراتی مطالعہ اسلام آباد اٹ خصوصی دود اڈ تننگا‘ ہراٹی اوغان عبوری وزیر خارجہ مولوی امیر خان متقی خاص انگا مہمان ئس‘ اوغانستان نا عبوری وزیرخارجہ امیر خان متقی دود آن تران کرسا پارے کہ اوغانستان نا بابت مایوس کروک تجزیہ غاک پورو وڑ اٹ چٹانو‘ بنا غان ڈیہہ و ہمسائے ملک آتیکن ننا خارجہ پالیسی مذاکرات وکمک کننگ آساڑی ءِ‘ پاکستان تون واپاری راہداری، اقتصادی، کاروباری تعلقداری تا ودفنگ ءِ اولیت ایتنہ‘ اوغانستان سویلی ایشیاء و نیامئی ایشیاء ءِ اوار کننگ کن کوشست کننگ اٹی ءِ‘ نن خوانہ کہ اوغانستان نا کسر اٹ نیامئی ایشیاء و سویلی ایشیاء اوار مریر‘ شون ہلیر‘ سیاسی اختلاف آتیان ایڑتر ڈیہہ انا جم شونہالی کن کاریم کننگ اٹی ان‘ کل چیلنج آتیان پد ہم نن پد ریسہ شونداری وشونہالی کن گام گیج کننگ اٹی ان۔ اوپارے کہ ہراتم نن کابل اٹ پترینگان تو اوغانستان پورو وڑ اٹ پیشن نا کمک آ سیبو کریکہ‘ اوغانستان نا خزانہ لٹنگا‘ خزانہ خورک‘ ادارہ غاک دیوالیہ‘پیشن نا رکھ آک ئسر‘ بینک اتون پیشن نادنیا غان خام مال ہلنگ کن پیسہ الو‘ ملک اٹ راجی شونداری کن فنڈ آتے دو کچ کرین‘ سکیورٹی فورس آتے دوارہ فعال کرین و اینو جہانی بینک پاننگ ءِ کہ اوغان طالبان حکومت نا بننگ آن پد اوغان کرنسی سوگو مسنے، اوغانستان اولیکو وار 2.6 ارب ڈالر نا بجٹ ءِ پیشن نا کمک آن بیدس بیرہ تینا وسیلہ غاتے ٹی جوڑ کرے۔ تدوک آ اوغان حکومت 875 ملین ڈالر نا برآمد کرے‘طالبان نا اوغان حکومت 2022ء اٹ برآمد آتا 1.5 ارب ڈالر نا ہدف تخا۔ خوشی نا ہیت دادے کہ کل مشکل آتیان پد ہم نن ہدف آن زیات 1.9 ارب ڈالر دوئی کرین۔ اوغانستان وزیرخارجہ پارے کہ اوغانستان اقتصادیات‘ علاقائی رابطہ غاتیا چکار کننگ اٹی ءِ‘ اوغانستان تاپی گیس پائپ لائن، کاسا اسہ ہزار، ٹرانز اوغان ریلوے وایلو رابطہ نا ڈٹ آتیا چکار کننگ اٹی ءِ۔ پاکستان و اوغانستان نا نیام اٹ ہمسایہ غان زیات تعلقداریک ءُ۔ ہڑتوم آ ملک آک تاریخی‘ مذہبی، راجی‘ جغرافیائی و السی رشتہ غاتتون گنڈوک ءُ۔ پاکستان و اوغانستان ءِ ویل آتے ایسر کننگ کن لچک نشان ترسا روشنا آخبت ناکنڈ آ گام کروئی مریک۔ امیر متقی پارے کہ ہڑتوم آ قوم تے غریبی‘ موسمیاتی تغیر، جانجوڑی و پین کیہی چیلنج مون تروک ءِ۔ پاکستان و اوغانستان ءِ بنداوی بنچر خاص وڑ اٹ ریل روڈ، راہداری ڈٹ آتے ٹی اسیجائی زرکاری کروئی مریک۔او پارے کہ ہمسائے و ایلم ملک پاکستان، ایران، ترکی، سعودی عرب، قطر تون اوار ایلوفتتون تعلقداری تے گچین کننگ اٹی ان۔

(آن لائن)

Get real time updates directly on you device, subscribe now.

Leave A Reply

Your email address will not be published.