دا وار عمران خان سڑک آتیا بس تو خوار کیوہ تے، رانا ثناء اللہ

فیصل آباد : پاکستان مسلم لیگ ن پنجاب نا صدراور بنجائی وزیر داخلہ رانا ثناء اللہ خان عمران خان نا سال اسے آن پد 14مئی آ ولدا سڑک آتیا بننگ نا دھڑکو نا ورندی ترسا پارینے کہ نی سڑک آتیا بر اگہ نی اُراغا ہنتویس تو ولدا ہندن ءُ جاگہ اسے آ راہی کیوہ نے ہراڑے نا گزران مشکل مریک‘ او عمران خان ءِ مذاکرات نا سلہ خلسا پارے کہ جوان ءُ سیاستدان اسے آنبار تولسا گچین کاری تا بابت ہیت کر نن گچین کاری تیکن سنبرینگوک ان‘ ولے نا دا وڑ انا دھڑکو تیان خلیسا گچین کاری کرفپنہ‘سال اسے آن دھڑکو تننگ اُس انت کریس‘ الس نے مسترد کرینے، 14مئی آ گچین کاریک مفسہ‘ نن گچین کاری تیکن تیاری کننگ اٹی ان ولے کس آن بلیک میل مفنہ‘ اوار تولسا ہیت کننگ کن تیار ان ولے اصولی موقف آن اسہ انچ اس ہم پدی مفنہ، ثا قب نثا ر عرف بابا‘ زحمتے داسہ عمران خان نا ایجنٹ جوڑ مسنے و پی ٹی آئی نا ٹکٹ آتے بہا کننگ اٹی ءِ، عمران خا ن بدبخت و اسہ فتنہ سے‘ اگہ ہمو وخت آ مسہ تُو اکن نگران حکومت بسکہ تو ملک دیوالیہ مسکہ۔ حوال نا رد اٹ بنجائی وزیرداخلہ رانا ثناء اللہ خاں ضلع فیصل آباد ناکل آن بھلا پبلک سیکرٹریٹ نا بناءِ کرے‘ دا وخت آ مسکوہی ایم پی اے ظفراقبال نگرہ، میا ں آصف اجمل، مسلم لیگ ن نا سٹی جنرل سیکرٹری میاں ضیاء الرحمن ہم ساڑی ئس۔دا وخت آ او مستی پارے کہ عمران نیازی اسہ فتنہ اسے‘ دا بدبخت ءِ ہمو وخت انا اسٹیبلشمنٹ، جوڈیشل اسٹیبلشمنٹ ءِ اتنگ نا انت گرج ئس، جسٹس شو کت صدیقی گواہی تننگ اٹی ءِ کہ اوڑا فیض حمید بس‘ فیض انت اکن ننے کشنگ کن خواری کریکہ‘ ولدا ملک اتون انت کل انا مون آٹے۔ اوپارے کہ میاں نواز شریف خواتوکہ کہ نن حکومت اٹ برین ولے ہمو وخت آ زرگزرانی چاہندار آک پاریر کہ اگہ مسہ تُو اکن نگران حکومت بس تو ملک دیوالہ مریک‘ بدبخت عمران خان ملک ءِ بھس کریسس۔ سال اسے آن پاننگ اٹی ءِ کہ گچین کاری کرفنگے‘ ولے دا وڑ انا دھڑکو تا خلیس آن گچین کاریک مفسہ۔ 25مئی سال اس مست ہم اسلام آباد بننگ نا دھڑکو تس ولے ولدا نرا۔ رانا ثناء اللہ پارے کہ نن فیصل آباد آن گچین کاری مہم نا بناءِ کرینن‘ نن گچین کاری تے ٹی سرسہب مرینہ و شونداری نا سفر نا دوارہ بناءِ کینہ۔

(آن لائن)