سیاسی سوگوی و شاری تا حق اکن آئین نا کسر ءِ دننگ المی ءِ، صدر مملکت

اسلام آباد: صدر مملکت ڈاکٹر عارف علوی پارینے کہ ملک اٹی سیاسی سوگوی و شاری تا بنداوی حق ءِ پک کننگ کن آئین نا کسر ءِ دننگ راج انا غٹ تپہ غاتا زمواری ءِ، انتظامی اتھارٹی آن بیدس ریاست و اونا ادارہ غاتا فرض ءِ کہ او راجی آسودہی آ تالان نظام نا کمک اٹ راج اٹ گچینی اتیر۔ داخیال آتا درشانی ءِ او دوشنبے نادے آ داڑے ایوان صدر اٹی راجی آسودہی کن السی خذمت آتا اعتراف نا بابت اڈ ہلوک دود آن تران کرسا کرے۔ نیٹ ورک فارہیومن اینڈ سوشل ڈویلپمنٹ نا کنڈآن دا دود اٹی انسانی خذمت و انسان دوستی نا بشخ اٹی محکمہ و بندغ آتا خذمت آتا اعتراف ءِ کننگا۔ صدر عارف علوی پارے کہ آئین شاری تے واکداری تسنے ہراڑان راجی انصاف آ تالان سیاسی نظام نا حامل آسودہی ریاست نا درک مسنے۔ اوپارے کہ آئین نا بالادستی بھاز المی ءِ انتئے کہ اونا تمبہ تعلیم، جان جوڑی، روزگار، و راجی و زرگزرانی انصاف تون اوار چندی بشخ آتیٹی بنداوی حق انا ہدف آتے متعین ءِ کیک۔ اوپارے کہ آئین سیاست دان یا ادارہ سے تون آخا بلکن ملک انا ہر بندغ نا بابت ءِ۔ صدر ودوک آ آبادی، خاص وڑاٹ نیزگاری، ناخواندگی و بے روزگاری نا ویل آتون مون تننگ کن راجی آسودہی و انسان سنگتی نا اہمیت آ زور شاغا۔ یونیسیف نا حساب وکتاب نا حوالہ ءِ ترسا اوپارے کہ پاکستان اٹی اسکول آتیان پیشن چناتا کچ 27 ملین ءِ ہرا اسہ بھلو چیلنج اسے و اوفتا تعلیمی و کسبکاری نا نظام اٹی اوار مننگ کن دمدستی گام گیج آتا گرج ءِ وخت اس کہ ملک انا آبادی نا 10 درسد خصوصی بندغ آتے ہم مرکزی دنگ اٹ اتنگ نا گرج ءِ۔

(اے پی پی)