کورونا تون مون تننگ کن غٹ اسٹیک ہولڈر آک اسیجا کاریم کیر، رﺅف رند

کوئٹہ (اے پی پی) وزیراعلیٰ بلوچستان نا کوارڈینیٹر میرعبدالروف رند و کمشنر مکران طارق قمر بلوچ نا اسیجا کماشی ٹی کوروناوائرسنا بابت اسہ اہم ءُ دیوان اس اڈہلک۔ ہراٹی ڈی پی او و کیچ نجیب پندرانی ، ریجنل ڈائریکٹر این آر ایس پی ڈاکٹر لعل جان، ایس پی او تربت نا سروک محراب بلوچ، کنوینر کیچ سول سوسائٹی التازسخی، انجمن تاجران تربت نا راہشون غلام اعظم دشتی آن بیدس ایلو غیرسرکاری ادارہ غاتا کارندہ غاک بھلو کچ اسے ٹی ساڑی ئسر، داوخت آ دیوان آن تران کرسا وزیراعلیٰ بلوچستان نا کوارڈینیٹر میر عبدالروف رند پارے کہ کوروناوائرس نا سوب آن مچ آ راج زہمی ءِ و ننے مرے کہ دانازرک وخت آ کورونا دین اتون مون تننگ کن غٹ اسٹیک ہولڈر آک اسیجا وڑاٹ کاریم کین و خلقت ءِ ریلیف نا گڑاسرکننگ کن حکومت تون اواری اٹ اسہ سوگو ءُ حکمت عملی اس شین کین۔ تانکہ راج انا پدسلوک آ تپہ ءِ اونا فائدہ دمدستی وڑاٹ سرمننگ کے۔ اوپارے کہ وزیراعلیٰ بلوچستان جام کمال خان نا کماشی ٹی صوبائی حکومت نا پرمان تے مون آ تخسا کوروناوائرس نا توننگ کن محکمہ جان جوڑی ، محکمہ داخلہ و ایلو ادارہ غاتا نیام اٹ اسہ سوگو ءُ حکمت عملی اس ٹہیفنگانے۔ و دابابت حکومت بلوچستان چندی ضلع غاتے ٹی آئیسولیشن وارڈز وکورنٹائن نا ہند جوڑ کرینے۔تانکہ دا دینی ناجوڑی ءِ بلوچستان اٹ تالانی آن توننگ مرے۔ داوخت آ کمشنر مکران طارق قمر بلوچ تران کرسا پارے کہ کورونا اسہ دینی ءُ ناجوڑی اس ضرور ارے ولے رکھی گام گیج اختیار کرسا دا ناجوڑی ءِ بھلو کچ اسسکان مون ئِ توننگ مریک و دا رد اٹ ننے مرے کہ نن الس ءِ دا دینی ناجوڑی انا بارواٹی آگاہی ودی کین تانکہ جانی نسخان تے کم آن کم کننگ مرے۔ داوخت آ اوالس آن خواست کرساپارے کہ او سنجیدگی نا درشانی ءِ کرسا حکومتی پارت آعمل کرسا بے گرج وڑاٹ پیشن پیش تمپس و تینا زیات تروخت ءِ اُراتیٹی گدریفرتانکہ دا ناجوڑی آن بچنگ مرے۔ داوخت آ میٹنگ اٹی بشخ ہلوک آتا کنڈآن داہیت آ امنا کننگاکوروناوائرس اٹی لاک ڈائون نا سوب آن دیہاڑی آکاریم کروک آ مزورکار غٹ آن زیات زہمی مسنے و داچرجوئی ٹی حکومت تینا وسیلہ غاتے کاریم اٹ اتسا ہندی غیرسرکاری ادارہ غاتون اواری اٹ اوفتے راشن و ایلو المی آ گڑاتا فراوانی ءِ اولیتی بنداو آ فراوان کیک۔ وخت اس کہ دیوان اٹی غٹ راجی تنظیم تا نیام اٹ رابطہ غاتے سوگو کننگ، ہم گرنچی ءِ مون آ دننگ ، لاک ڈائون آن زہمی مروک آتے ٹی راشن نا فراوانی، وسیلہ ودی کننگ نا میکنزم و ایلو چیلنج آتون مون تننگ کن ”کیچ ڈیزاسٹررسپانس فورم“ جوڑ کننگا۔ و این آر ایس پی نا ڈائریکٹر ڈاکٹر لعل بلوچ ءِ امنائی اٹ دا فورم نا کوارڈینیٹر گچین کننگا۔ اوکان پدکیچ ڈیزاسٹررسپانس فورم نا کور کمیٹی اس ہم ٹہیفنگا۔ ہراٹی محکمہ جان جوڑی و انتظامیہ غان بیدس میر عبدالروف رندکوارڈینیٹر ٹوسی ایم بلوچستان، اعجاز احمد فوکل پرسن ریلیف این جی اوز اینڈ پبلک ریپریز نٹیٹیوز ، قدیر لقمان سوشل ویلفیئر آفیسر، التیازسخی کنوینر کیچ سول سوسائٹی، محراب بلوچ، سروک ایس پی او، غلام اعظم دشتی راہشون انجمن تاجران کیچ، زرگل زبیر چیئرپرسن رائزنگ یوتھ آف بلوچستان ، معراج روشن جنرل سیکرٹری کورونا آگاہی مہم کیچ، حاجی کریم بخش، صدر الخیر ٹرسٹ ، غلام یاسین الخدمت کمیٹی ، تنویر ودارراجی راہشون ، ارشاد اختر صدر پریس کلب تربت وگلزار گچکی راجی راہشون ءِ باسک کور کمیٹی اٹی امنائی اٹ گچین کننگا