قلات وایب کیب اٹ تھری جی انٹرنیٹ و ای وی او انٹرنیٹ سسٹم ءِ دمدستی بحال کننگے‘سردارزادہ زاہد جان لہڑی
Get real time updates directly on you device, subscribe now.
قلات (تلار حوالکار) جمعیت علماءاسلام سب تحصیل جوہان نا سرپرست سردارزادہ میرزاہدجان لہڑی محمد عمر غزنونی وایلوفک پارینو کہ قلات اٹ تھری جی انٹرنیٹ و ای وی او انٹر نیٹ سسٹم مفننگ نا سوب آن طالب علم آک فریشان ءُ‘ لاک ڈاﺅن نا سوب آن آن لائن خوانوک طالب علم آتے مشکل آک مون تروئی تمنگ ءُ۔ ضلع قلات و ایب کیب اٹ تدوک آ مسہ سال آن تھری جی انٹرنیٹ و ای وی او انٹرنیٹ سسٹم نا بند مننگ آن الس ‘ پوریاگر برادری وصحافی و خاص وڑ اٹ طالب علم آک انٹرنیٹ نا آسراتی آن محروم ءُ۔ دا خیال آتا درشانی ءِ او تینا جاری کروک بیان اٹ کرے۔ او پارے کہ قلات و ایب کیب اٹ مسہ سال آن تھری جی انٹرنیٹ و ای وی او سسٹم نا بند مننگ آن قلات ناالس دا پوسکن آ دور اٹ ہم دا بنداوی آسراتی آن محروم ءِ و خاص وڑ اٹ کورونا دَین نا بابت رکھی گام گیج و ملک انا ساڑی حالیت آتیان بے خبر ءِ۔ اوپارے کہ کورونا ناسوب آن بھاز آ یونیورسٹی و اسکول آک داسہ آن لائن خوانفنگ نا بناءِ کرینو ولے بدبختی اٹ قلات نا طالب علم آک دا پوسکن آ دور اٹ ہم تعلیم آن محروم ءُ۔ او بڑزکو کمامدار آتیان خواست کرے کہ قلات وایب کیب اٹ تھری جی انٹرنیٹ و ای وی او انٹرنیٹ سسٹم ءِ دمدستی بحال کرسا طالب علم آتا نہادی وخت ءِ زیان مننگ آن بچفنگے۔