وزیراعظم نا کماشی ٹی دیوان‘صوبائی سپورٹس بورڈ آتا اول سر جاچ ہلنگ نا پارت

اسلام آباد (مانیٹرنگ ڈیسک) وزیراعظم عمران خان صوبائی سپورٹس بورڈ انا اول سر جاچ و پُوسکن ءُُ اسپورٹس میپ اس جوڑ کننگ نا پارت کرینے۔ حوال نا رداٹ وزیراعظم عمران خان نا کماشی ٹی دیوان مسنے ہراٹی گوازی تا جوانی کن گام گیج نا بابت اٹ جاچ ہلنگا۔ دیوان آن تران اٹ او پارینے کہ پاکستان اٹ گوازی تا بے کچ پوٹینشل ارے، مالو ہم ننا گوازی گرک کرکٹ، ہاکی، سکواش و ایلو روایتی گوازی تیٹی کیہی سال تسکان پن کٹانو۔ وزیراعظم پارینے کہ ولے بدقسمتی اٹ سفارشی کلچر، کرپشن، میرٹ نا حوصلہ شکنی و نااہلی آن گوازی تیٹی کارکڑد بے آب مس۔ اوفک ضلعی کہول آ ٹیلنٹ ہنٹ و مقابلہ سازی کن تنظیمی جون نا اول سر جاچ انا گرج آ زور شاغسا پارے کہ داڑان پاکستان اٹ گوازی تا بحال نا بنا مریک۔ عمران خان پاریسُس کہ ماضی نا گوازی تا تنظیمی جون غیر فعال مسنے۔ دا غیر فعال جون نا سوب آن قومی ٹیلنٹ نا ہم حوصلہ شکنی مننگ اٹی ءِ۔