افسر آک راج انا عظیم اکثریت نا خذمت کن مریرہ، ولی کاکڑ

کوئٹہ : گورنر بلوچستان ملک عبدالولی خان کاکڑ پارینے کہ آفیسر آک الس نا خذمتگار ءُ‘ نمے تینا وتینا چنکاخاہوت تون اوار راج اناخذمت ءِ کروئی ءِ‘ اسہ کنڈآ افسر آتے شاندار ہنکین‘ جوان ءُ تنخواہ‘ نہادی گاڈی و کل بنداوی آسراتیک دوئی ءُ وخت اس کہ ایلو کنڈآ الس غٹ بنداوی و المی آسراتی تیان ءِ محروم ءِ‘ ہندا سوب آن نمے دا کنڈ آ چکار کننگ و الس نا بے خذمت کرسا تینا آسراتی و آسودہی تا سوب ودی کروئی مریک انتئے کہ نما منصب نا اصل مسخت پیسہ کٹنگ نا جاگہ غا غریب الس نا خذمت کننگ ءِ۔ دا خیال آتا درشانی ءِ او نیشنل انسٹی ٹیوٹ آف مینجمنٹ کوئٹہ ٹی ہیل کروک افسر آتا گڈیکو دود آن تران کرسا کرے۔ داوخت آ گورنر بلوچستان پارے کہ علم و واکداری تا سوب آن مفک کہ انسان بیرہ تینا ذات ءِ فائدہ ایتے بلکہ دانا حقی آ مسخت دا مریک کہ داڑان الس ءِ فائدہ رسیفنگے۔ اللہ تعالیٰ ہمو بندغ ءِ دوست کیک ہرا خدا نا بندغ آتا کاریم اٹ برے۔ پاکستان زندہ باد و بلوچستان پائندہ آباد نا نعرہ غاک گنج افس بلکہ دا نعرہ غاتیا اوفتا روح انا وڑ عمل کننگ المی ءِ۔ گورنر بلوچستان پارے کہ ہر پبلک سرونٹ تینا ضمیر نا مون آ بایدے تینے آن حساب ہلے و آئین وکانود نا رد اٹ تینا کسبی فرض ءِ دیانتداری اٹ سر تننگ و السی خذمت آپبی چکار کے۔ او افسر آتیا زور شاغا کہ او انسان دوست رویہ تینائی کیر‘ غربت ومحرومی نا گواچی لس بندغ کن مسیحا جوڑ مریر۔ گورنر بلوچستان بیوروکریسی ٹی نیاڑی تا کچ اٹ ودکی ءِ ستا کڑزوک گوندا۔ او ایلو صوبہ غاتیان بروک افسر آتے پارے کہ کنے یقین ءِ کورس انا وخت آ نمے صوبہ نا حالیت و الس نا سختی تیان آگاہی مسنے‘ ہندا سوب آن نم تینا تینا محکمہ غاتے ٹی بلوچستان نا الس نا مشکل آتے چٹفنگ کن کڑد ادا کیرے۔

(خ ن)