پنجاب، کے پی گچین کاری ازخود نوٹس مسترد مس، جسٹس اطہر من اللہ

اسلام آباد : سپریم کورٹ نا جسٹس اطہر من اللہ پنجاب و خیبرپختونخوا ٹی گچین کاری تا بابت ازخود نوٹس کیس اٹ سرجم اختلافی نوٹ جاری کرے ہراٹی او پارینے کہ چار مسٹ نا حساب اٹ مسترد مس و گوندا کہ پی ٹی آئی نا اسمبلی تیان استیفہ تننگ نا سوب آن سیاسی تنکی زیات مس‘ ازخود نوٹس نا کارروائی عدالت ءِ بے تک سیاسی جھیڑہ نا گواچی کرینے‘ عدالت ءِ سیاسی جھیڑہ غان بچنگ کن تینا نوٹ اٹ فل کورٹ جوڑ کننگ نا سلاہ تسٹ‘ جمعہ نا دے جاری کروک جسٹس اطہر من اللہ نا سرجم اختلافی نوٹ 25 پنہ غا تالان ءِ۔ جسٹس اطہر من اللہ پارینے کہ سپریم کورٹ تون اوار کل ادارہ غاک تینا ای ءِ اسہ کنڈ آ تخسا بایدے آئینی زمواری تے سر ایتر‘ دا وخت ارے کہ کل زموار آک اسہ گام اس پدی مریر و خود شناسی نا سیبو ہلیر‘ او پارے کہ نن مستین نا تاریخ آن ہچ ہیل کتنن۔ جسٹس اطہر من اللہ سرجم اختلافی نوٹ اٹ مستی پارے کہ پنجاب و خیبرپختونخوا ٹی گچین کاری تا تاریخ نا بابت ازخود نوٹس خارج کننگک‘ درخواست و ازخود نوٹس ءِ خارج کننگ نا مسہ بنداوی سوب ءُ‘ او تینا اختلافی نوٹ اٹ نوشتہ کرے کہ آرٹیکل 184 (3) نا کاریم نا بنداوی اصول آتا خیال ءِ کننگ بینچ آ المی ئس‘ اوپارے کہ عدالت ءِ تینا کنڈ ہلپننگ کن سیاسی جماعت آتا فائدہ غاتا باندات آتیا بایدے احتیاط کے۔ عدالت بایدے سیاسی درخواست ناوڑوڈول و نیک نیتی ءِ ہم ہُرے۔ جسٹس اطہر من اللہ پارے کہ درخواست گزار آتا رویہ دا ہیت انا خواستگار اف کہ 184/3 نا سماعت ناواکداری ءِ کاریم اٹ اتنگے۔ سرجم نوٹ اٹ جسٹس اطہر من اللہ ناکنڈآن پاننگا کہ ازخود نوٹس ہلنگ نا مطلب غیر جمہوری اقدار و حکمت عملی ءِ سوگو کروئی مریک‘ مستین نا فیصلہ غاتے مٹائفنگ تو مفک ولے السی پت ءِ بحال کننگ نا کوشست تو کننگ مریک۔ گچین کاری تا تاریخ نا باندات اسہ جھیڑہ سے آن ودی مس ہراکہ بنداوی وڑ اٹ سیاسی ویل اس ئس۔ جسٹس اطہر من اللہ جسٹس یحییٰ آفریدی نافیصلہ نا مخ تفی ءِ کرسا پارے کہ جسٹس یحییٰ آفریدی سہی پارینے کہ عدالت ازخود نوٹس نا کاریم اٹ اتنگ اٹ بایدے احتیاط کے۔ اختلافی سرجم نوٹ اٹ جسٹس اطہر من اللہ پارے کہ ای جسٹس سیّد منصور علی شاہ و جسٹس جمال خان مندوخیل ناسلاہ تا امنا اٹ ہراٹی او پاریر کہ سپریم کورٹ ءِ پد ریسہ سیاسی جھیڑہ غاتے ایسر کننگ نا ہند جوڑ کننگ انگ ءِ۔ ازخود نوٹس نا فیصلہ چار مسٹ نا حساب اٹی ءِ۔ 23 فروری نا سماعت نا پرمان اٹ جسٹس یحییٰ آفریدی نا جتاءُ نوٹ اس ہم اوار ئس۔ جسٹس یحییٰ آفریدی ازخود نوٹس و درخواست آتے ناقابل سماعت مننگ آ مسترد کریسس۔ جسٹس اطہر من اللہ تینا اختلافی نوٹ اٹ نوشتہ کرے کہ ای سرجم سوب آتے ٹی دا ہیت ءِ ریکارڈ آ تخنگ خواوہ کہ ای نئے تینٹ بینچ آن جتا مسٹ و تعلقداری تے چٹفیٹ۔

(آن لائن)