قومی سلامتی کمیٹی نا دہشتگردی نا برخلاف آپریشن ءِ تیز کننگ آ امنا

اسلام آباد: سیاسی و عسکری راہشونک ملک اٹ دہشت گردی تور کارروائی تے پی ترند کننگ‘قومی باندات آتیا ہچ پدی مفننگ نا عزم درشان کرسا پارینو کہ ملک انا تہہ و پیشن نا سلامتی ہچ سمجھوتہ کننگپک‘ حوال نا رد اٹ وزیراعظم شہباز شریف نا کماشی ٹی جمعہ نا دے قومی سلامتی کمیٹی نا 41 می دیوان اڈ ہلک ہرا 2 گھنٹہ اسکان برجا سلیس‘ دیوان اٹ چیئرمین جوائنٹ چیفس تون اوار ہر مسٹ آ سلہہ بند فوج انا سروک‘ حوالکاری‘ دفاع، خزانہ، خارجہ و وزارت داخلہ نا وزیرک‘ سندھ و کے پی کے نا وزیراعلاک ساڑی ئسر‘ دیوان اٹ ڈی جی آئی ایس آئی، ڈی جی آئی بی، ڈی جی ایم آئی و ڈی جی ایم او تون اوار ایلو عسکری و سویلین کمامدار آک بشخ ہلکر‘ وخت اس کہ دیوان اٹ کمیٹی ناباسک و ہر چار آ وزیراعلاک خصوصی وڑ اٹ بشخ ہلکر‘ دیوان اٹ امن وایمنی نا حالیت‘ تہہ وپیشن و زرگزرانی حالیت آتا جاچ ءِ ہلنگا‘ حوالی نا رد اٹ دیوان اٹ حساس ادارہ غاتا سروک آک قومی سلامتی آ بریفنگ تس‘د یوان ناوخت آ شریدار آک ملک انا چندی بشخ آتے ٹی شرپسندی نا برخلاف برجا کارروائی تیا است جمی نا درشانی کرے۔ دہشت گردی نا واقعہ غاتے ٹی شہید مروک آتا خذمت آتیا خراج عقیدت پیش کرے‘ بلوچستان اٹ کالعدم تنظیم ناسروک ءِ دزگیر کننگ آ ادارہ غاتے خراج تحسین پیش کننگا‘ حوالی نا رد اٹ قومی سلامتی کمیٹی دہشت گردی تور آپریشن تے برجا تخنگ آ امنا کرے و فیصلہ کننگا کہ دہشت گرد آتا برخلاف زیرو ٹالرنس پالیسی برجا سلک‘ سکیورٹی ادارہ غاتا افسر و ورناتا قربانیک بے بھرم ہنپسہ‘ دیوان اٹ وزیر خزانہ اسحاق ڈار ملک انا زرگزرانی حالیت آتیا شریدار آتے بریفنگ تس ہراٹی آئی ایم ایف تون مذاکرات و سنگت ملک آتا قول تیان ہم معلومدار کرے‘ حوالی نا رد اٹ قومی سلامتی کمیٹی قومی باندات آتیا سمجھوتہ کپننگ نا عزم کرے۔ کمیٹی پارے کہ ملک انا تہہ وپیشن نا سلامتی آ ہچ سمجھوتہ کننگپک۔ سلامتی کمیٹی ملکی سلامتی و سوگوی کن کل ءِ اواری اٹ کڑدار ادا کننگ آ زور شاغا۔ قومی سلامتی کمیٹی نا دیوان آن مست پارلیمانی راہشون تا دیوان اٹ وزیراعظم سیوتی جماعت آتے پت اٹ ہلک۔ پارلیمانی پارٹی راہشون تا دیوان اٹ خالد مقبول صدیقی، اسلم بھوتانی، خالد مگسی، خرم دستگیر، بنجائی وزیر کانود اعظم نذیر تارڑ وایلو راہشون ساڑی ئسر‘ دیوان اٹ ساڑی سیاسی و عدالتی حالیت آتا گپ وتران کننگا۔ وزیراعظم پارلیمانی راہشون تے آخبت نا حکمت عملی آ پت اٹ ہلک‘ اہم انگا دیوان اٹ ڈیہہ انا حالیت‘ پاک امریکہ تعلقداری تیا سجفنگا۔ داکان بیدس دیوان اٹ ایران، اوغانستان و بھارت تون اوار علاقہ نا حالیت آتیا گپ وتران کننگا‘ دیوان اٹ ایران سعودی عرب تعلقداری تا بحالی ٹی چین انا کڑدار آ ہم ہیت وگپ مس و ملکی زرگزرانی و سیاسی حالیت آتیا سرجم گپ وتران کننگا۔