پبلک اکاؤنٹس کمیٹی نا سپریم کورٹ نا بجٹ نا آڈٹ نا پرمان
چیئرمین پی اے سی اسہ تُو اسے ٹی بڑزکو کہولی عدلیہ نا جج آتا تنخواہ، آسراتی و پلاٹ آتا سرجم آتے بٹنگا،داکان مست ہم رپورٹ بٹنگ انگاسس
Get real time updates directly on you device, subscribe now.
اسلام آباد : پارلیمنٹ نا پبلک اکاؤنٹس کمیٹی (پی اے سی) سپریم کورٹ نابجٹ نا آڈٹ ناپرمان کرے۔ پی اے سی اسہ تُو اٹ بڑزکو عدلیہ نا جج آتا تنخواہ‘ آسراتی و پلاٹ آتا سرجم آتے ہم بٹنگانے‘ داکان مست پی اے سی بڑزکو عدلیہ نا آسراتی تا بابت رپورٹ خواہسوسس‘ تو آڈیٹر جنرل پارے کہ ای ریکارڈاسکان سرمننگ کپننگ اٹ‘ دیوان اٹ دوارہ دا باندات چست کننگا و چیئرمین پی اے سی تُو اسے ٹی بڑزکو عدلیہ نا جج آتا تنخواہ‘ آسراتی و پلاٹ آتا سرجم آتے بٹنگا سرجم حوال آتا ر داٹ پبلک اکاؤنٹس کمیٹی نا دیوان سے شنبے نادے آ پی اے سی نا چیئرمین نور عالم خان نا کماشی ٹی پارلیمنٹ ہاؤس اٹی اڈ ہلک۔ دیوان اٹی کمیٹی نا باسک آتون اوار تعلقدار سرکاری ادارہ غاتا بڑزکو آفیسر آک بشخ ہلکر۔ دیوان نا بناآ کمیٹی نا باسک شاہدہ اختر علی پارے کہ کینال روڈ لاہور اسہ سیاسی جماعت اسے نا لیڈر نا سوب آن بند ءِ ہراڑا نور عالم خان پارے کہ کینال روڈ تو اسہ کنڈا مچ آملک انا ہندا حال ءِ۔ اوپارے کہ وی آئی پی کلچر ءِ کس اس چٹفنگ خواپک،کرکٹ میچ انا سوب آن ہم شاری تے مشکل آتون مون تروئی تمک، دا باندات آ چیئرمین پبلک اکاؤنٹس کمیٹی نور عالم خان بروک آ دیوان اٹی وزارت داخلہ غان ورندی بٹنگ نافیصلہ کرے۔ فیڈرل بورڈ آف ریونیو نا آڈٹ رپورٹ نا جاچ ءِ ہلسا چیئرمین پی اے سی پارے کہ نن ہمو ایف بی آر آفیسر آتا لڑ ءِ خواہسوسن ہرا مسہ سال آن اسہ جاگہ غا تعینات ءُ۔ آڈیٹر جنرل پارے کہ ایف بی آر ہمو لڑتے ننے فراوان کتو بلکن ننے آن او اَرفے کہ نم لڑتے خواہنگ نا سوب آتے پابو۔ نور عالم خان پارے کہ اسلام آباد نا پوش سیکٹرز اٹی ہند آتا مالک آتیان کٹیا و خراج نا سرجم آتے بٹنگ ناہم پارت کریسن۔ ہرانا ہچ ءُ ورندی اس تننگتو۔ اوپارے کہ اوفتیان اَرفنگے کہ ایف سکس، ایف سیون کون آ سیکٹرآتیٹی ہند یا پلازہ اوفک امر جوڑ کرینو۔ پبلک اکاؤنٹس کمیٹی جی سکس آن جی 13، ایف سکس آن ایف الیون و ای سیون نا سیکٹرآتیٹی مالک آتیان خرا ج و کٹیا نا سرجم آتے دوئی کننگ نا پارت کرے۔ چیئرمین ایف بی آر پارے کہ نن سی ڈی اے آن ملکیت نا ریکارڈ ءِ خواہسونن، ننے و ریکارڈ ملے تو ڈور ٹو ڈور تصدیق نا بناءِ کینہ۔ نور عالم خان پارے کہ اسہ اسہ ہند انا کِرا 25 لکھ روپئی اسکان ءِ۔ پی اے سی ایف بی آر نا کنڈآن آڈٹ کمامدارآتے پورو ریکارڈ فراوان کپننگ نا نوٹس ءِ ہلسا کابینہ ڈویژن و وزارت خزانہ ءِ دا چرجوئی ٹی چٹھی اس نوشتہ کننگ نا فیصلہ کرے وپارت کرے کہ غٹ وزارت و ذیلی ادارہ غاک، کارپوریشن آک آڈٹ کمامدارآتے پورو ریکارڈ فراوان کیر۔ چیئرمین ایف بی آر پارے کہ آڈٹ کمامدارآتے ایف بی آر ریکارڈ اسکان پورو رسینگ تننگ مفک انتئے کہ گڑاس سیکورٹی ویل آک ہندن ءُ ہرانا سوب آن دا ممکن اف۔
(مانیٹرنگ ڈیسک/اے پی پی)