بلوچستان اٹی اسمبلی ءِ تحلیل کرسا شفاف گچین کاری کرفنگے،آل پارٹیز کانفرنس نا خواست

آل پارٹیز کانفرنس نا مسٹمیکو دیوان آن پد کوئٹہ پریس کلب اٹی اسیجائی پریس کانفرنس آن جمعیت نا صوبائی امیر سینیٹر مولانا عبدالواسع، نیشنل پارٹی نا سروک ڈاکٹر عبدالمالک بلوچ، عوامی نیشنل پارٹی نا صوبائی صدر اصغر خان اچکزئی، بی این پی نا اختر حسین لانگو، ایچ ڈی پی نا قادر علی نائل، پشتونخوا نیشنل عوامی پارٹی نا عیسیٰ روشان و ایلوفک تران کریر۔ دا وخت آ جمعیت علمائے اسلام بلوچستان نا صوبائی امیر سینیٹر مولانا عبدالواسع پارے کہ بلوچستان نا ساڑی سیاسی و امن ایمنی نا حالیت آتیا جم سجفنگا و کیہی اہم فیصلہ کننگا۔ او حکومت آن خواست کرے کہ سانحہ زیارت تون تعلقدار پک کروک معاہدہ غا دمدستی عمل درآمد کننگے و سیاسی جماعت آتے اسہ کنڈ کننگ نا پالیسی ءِ اینک کننگے۔ مولانا عبدالواسع پارے کہ بروک آ آل پارٹیز کانفرنس ستمبر اٹی اڈ تننگک، ہراٹی کل بنجائی سرکڑدہ غاک بشخ ہلیرہ‘ او پارے کہ مہالو ہم پارین کہ “فارم 47” والا نظام چلینگ کپک، وخت اس کہ اینو حکومت نا جند انا واکدار وزیرداخلہ ہم امنا کننگ اٹی ءِ کہ نظام سہی وڑ اٹ چلینگ پننگ انگ ءِ۔ او پارے کہ الس نا گچین مروک نمائندہ غاتے حکومت کننگ نا حق تننگے و بلوچستان اٹی اسمبلی ءِ تحلیل کرسا آجو‘ انصاف آ تالان و شفاف لس گچین کاری کرفنگے۔ او پارے کہ ریاست، ملک و بلوچستان ءِ مون تروک تنکی تیان کشنگ اٹی سیاسی جماعت آک بھرمی کڑد ادا کننگ کیرہ، ہندا سوب آن داسہ ہم وخت ارے کہ اصلاحات کرفنگے۔ او پارے کہ نیشنل پارٹی نا سروک ڈاکٹر عبدالمالک بلوچ 17 ٹکی ایجنڈا ءِ کل اسٹیک ہولڈر آتا نا مون آ تخانے۔ او پارے کہ درملکی نیام تمنگ نا خلیس آتے رد کننگ مفک، ولے دا ہم ہُروئی مریک کہ الس اٹی بے باوری انتئے ودی مننگ اٹی ءِ۔ او بلوچستان نا کل شاہراہ تے بے رکھوک گوندسا امن وایمنی نا حالیت آتیا سخت گڑتی نا درشانی ءِ کرے۔ مولانا عبدالواسع پشتونخوا ملی عوامی پارٹی نا کنڈ آن آل پارٹیز کانفرنس نا جاگہ غا پشتون جرگہ بٹنگ انگ آ ارمان نا درشانی ءِ کرسا پارے کہ آل پارٹیز کانفرنس نا است خواہی ئس کہ اپوزیشن لیڈر محمود خان اچکزئی کل سیاسی جماعت آتے تین تون اوار کرسا اسیجائی پلیٹ فارم آ دیوان بٹنگوسس۔ او زور شاغا کہ سیاسی باندات آتے سیاسی دنگ اٹی اٹ مرسا ایسر کننگے۔