درملکی ہیلکاری پولیس آفیسر آتا ٹریننگ نا المی ءُ بشخ اسے ،بنجائی وزیر داخلہ

بنجائی وزیر داخلہ محسن نقوی درملکی ہیلکاری ءِ پولیس افسر آتا ٹریننگ نا المی بشخ جوڑ کننگ نا پڑو ءِ کرسا پارینے کہ پولیس نظام ءِ پین گچین کننگ کن پوسکن پولیسنگ نا سرسہب ماڈل آتا و پوسکنوڑ ٹیکنالوجی آن پورو فائدہ ہرفنگک۔ دا خیال آتا درشانی ءِ او اسلام آباد اٹی چین و ترکیہ غان ہیلکاری کورس پورو کرسا پدی بروک اسسٹنٹ سپرنٹنڈنٹ آف پولیس (اے ایس پی) تون اوڑدہی نا وخت آ کرے۔ دا وخت آ کمانڈنٹ نیشنل پولیس اکیڈمی، ڈی جی ایف آئی اے و ایلو بڑزکو تعلقدار افسر آک ہم ساڑی ئسر۔ اوڑدہی نا وخت آ اے ایس پیک چین و ترکیہ نا پوسکن آپولیسنگ، سرویلنس سسٹم و امن و ایمنی نا انتظام نا بابت تینا مشاہدہ غاتا بارواٹ وزیر داخلہ ءِ معلومدار کریر و دا کورس آتے کسبی لائخی تے بڑز کننگ کن اسہ گچین ءُ آزموندہ اس گوندار۔ وزیر داخلہ درملکی ہیلکاری پروگرام آتے پولیس افسرآتا کسبی ہیلکاری نا آخبتی بشخ جوڑ کننگ نا پڑو کرسا پارے کہ اسلام آباد اٹی چین نا وڑ اٹ ‘لا انفورسمنٹ انویسٹی گیشن سنٹر’ نا جوڑ کننگ کن پائلٹ پراجیکٹ نا بناءِ کننگک۔ او پارے کہ دا سنٹر اٹی ڈیٹینشن، انویسٹی گیشن و سمری ٹرائل اسہ چھت انا شیف آن مریک تانکہ چنکا وڑنا ڈوہ تا مقدمہ غاتا دمدستی و گچین خیر ءِ پک کرفنگ مرے۔ محسن نقوی پارے کہ ڈوہ تا توننگ و گچین چاروکی کن وزارت داخلہ نا ایوی ایشن ونگ اٹی پوسکنوڑ ڈرون آتے اوار کننگک و پوسکن سرویلنس سسٹم تا کمک اٹ چاروکی نا دنگ ءِ ودفنگک۔ او پارے کہ نیشنل پولیس اکیڈمی ٹی اسپیشلائزڈ انویسٹی گیشن رومز جوڑ کننگک وخت اس کہ انٹیروگیشن (پرسجو) ءِ سپیشلائزڈ اسبجیکٹ نا وڑ اٹ درستی راستی کرفسا شون ہلوک ملک آتا ماڈل آتیا پوسکنوڑ تکنیک ہیلکاری نا بشخ جوڑ کننگک، داکان بیدس پولیس نا آپریشنل گرج آتتون ہمگرنچ پوسکن یونیفارم ہم درستی راستی کرفنگک۔