ملکی امن و سلامتی کن جان تروک آک ہیرو ءُ، فرح عظیم شاہ
کوئٹہ: ترجمان حکومت بلوچستان گودی فرح عظیم شاہ پارینے کہ ملکی امن و سلامتی کن جان قربان کروک آ قوم انا ہیروک ءُ۔ شہید آتا خاہوت آتیکن اوفتا کمتی ءِ پورو کننگ ناممکن ءِ۔ صوبائی حکومت ہر ممکن کوشست کننگ اٹی ءِ۔ خاہوت آتون ڈکھ و دڑد ءِ بشخ وپانٹ کننگے و خاہوت آتا گرج آتے پورو کرسا تینا زمواری تے جوان وڑاٹ پورو کننگے۔ ترجمان صوبائی حکومت پارینے کہ صوبائی کابینہ کمپینسیشن پالیسی اٹ ترمیم نا منظوری ترسا معاوضہ غاتیٹی ودکی نا زوت اس پورو کننگک۔ دا منظوری آن پد پولیس و لیویز نا گریڈ (1 تا 16) نا شہید آتا کمپینسیشن رقم 30 لکھ آن ودفسا کروڑ کننگانے و گریڈ 17 نا شہید اے ایس پی و ڈی ایس پی نا کمپینسیشن 50 لکھ آن ودفسا اسہ اسہ کروڑ پنجاہ لکھ روپئی کرینے۔ ہندن گریڈ 18 و 19 نا پولیس و لیویز شہید آتا کمپینسیشن رقم 90 لکھ آن ودفسا 2 کروڑ روپئی کرینے۔ گریڈ 20 و 22 نا پولیس و لیویز شہید آتا کمپینسیشن اسہ کروڑ روپئی آن ودفسا 2 کروڑ کرینے۔
(خ ن)