بولان‘بلوچستان کانسٹیبلری نا ٹرک آ خود کش جلہو، 9 کارندہ شہید

دھماکہ بولان نا علاقہ کمبڑی پول نا خڑک آ مس، 11 کارندہ ٹھپی ہم مسر، سول ہسپتال سبی ٹی ایمرجنسی نافذ

0

Get real time updates directly on you device, subscribe now.

کوئٹہ : بولان نا علاقہ ٹی بلوچستان کانسٹیبلری نا گاڈی آ مبینہ خودکش جلہو اٹی 9 کارندہ شہید وخت اس کہ 7 ٹھپی مسنو۔ ایس ایس پی کچھی محمد نوتیزئی پارے کہ دوشنبے نا سہب اتون بولان نا علاقہ کمبڑی پول انا خڑک بلوچستان کانسٹیبلری نا گاڈی آ نادرست دہشت گرد آک خود کش جلہو کریر ہراٹی 9 کارندہ محمد حیات، اے ایس آئی گل بدین، سمیع اللہ، شہزاد، اسحاق، دولت، نذیر، قیوم و ظہور شہید وخت اس کہ 7 کارندہ سلیم جاوید، عبدالسلام، غلام قدیر، عطاء اللہ، عبدالحق، محمد یعقوب و رستم علی ٹھپی مسنو۔ دھماکہ نا حوال ملنگ تون پولیس و ایف سی نا بھلو نفری اس موقع غا سرمس لاش و ٹھپی تے دمدستی وڑاٹ ہسپتال آ گدریفنگا۔ وزیراعلیٰ بلوچستان میر عبدالقدوس بزنجو سبی نا خڑک بلوچستان کانسٹیبلری نا گاڈی نا خڑک بمب دھماکہ نا مذمت ءِ کرسا دھماکہ ٹی کارندہ غاتا شہیدی و ٹھپی مننگ آ ڈکھیائی و است ہسونی نا درشانی ءِ کرینے۔ داڑے جاری مروک اسہ بیان اسے ٹی وزیراعلیٰ پارے کہ دہشت گرد آک لغوری کارروائی تے اٹ ناپاک مسخت آتے دوئی کننگ خوارہ و بدامنی و نزوری ودی کرسا بلوچستان ءِ پسماندہ تخنگ نا سازش کننگ انگ ءِ داوڑنا غٹ سازش آتے الس نا مخ تفی اٹ بے سہب کننگک۔ وزیراعلیٰ شہید کارندہ غاتا خاہوت آتون ہڑزخواہی و ہمدردی نا درشانی ءِ کرے۔ وزیراعلیٰ پارے کہ الس نا جان و مال و ملک انا رکھ اکن جان تے ندر کروک آک قوم انا ہیروک ءُ شہیدآتا قربانیک زیان مفسہ۔ اودعا کرے کہ اللہ تعالیٰ شہید آتا درجہ غاتا بڑزی و خاہوت ءِ صبر و جمیل عطاکے۔ اوٹھپی مروک آتا زوت دراخ جوڑی کن ہم دعا کرے۔ داکان بیدس صوبائی وزیر داخلہ میرضیاء اللہ لانگو سبی نا علاقہ ٹی بی سی نا گاڈی آ جلہو نا مذمت ءِ کرسا آئی جی بلوچستان آن واقعہ نا رپورٹ ءِ بٹنگا۔ داڑے جاری مروک اسہ بیان اسے ٹی وزیرداخلہ میر ضیاء لانگو انتظامیہ ءِ بمب دھماکہ نا ٹھپی تے طبی آسراتی فراوان کننگ نا پارت ککرے۔ اوپارے کہ صوبائی حکومت دہشت گردی نا چٹفنگ کن فورس آتا کاریم نا کچ ءِ ودفنگ اٹ پورو کمک کیک۔ اوپارے کہ لغوری نا کارروائی تیان صوبہ نا امن ءِ نسخان تننگ نا ہر کوشست بے سہب مریک۔ وزیرداخلہ پارے کہ شہید آتے مچ آ قوم سلام پیش کیک۔ اودھماکہ ٹی شہید مروک آ کارندہ غاتا خاہوت تون ہڑزخواہی و ٹھپی تا زوت دراخ جوڑی کن دعا کرے۔

(اے پی پی)

Get real time updates directly on you device, subscribe now.

Leave A Reply

Your email address will not be published.