ملک ءِ دہشتگردی نا لعنت آن پاک کینہ،صدر و وزیراعظم

اسلام آباد : وزیراعظم شہباز شریف سبی ٹی بلوچستان کانسٹیبلری نا کارندہ غاتا شہیدی آ غم و است ہسونی نا درشانی ءِ کرینے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم خودکش دھماکہ نا ترندی اٹ مذمت ءِ کرے و شہید کارندہ غاتا خاہوت آتون ہڑزخواہی و ہمدردی نا درشانیءِ کرینے۔ وزیراعظم ٹھپی تے گچین طبی آسراتی تا فراوانی نا پارت کرے۔ وزیراعظم پارے کہ بلوچستان اٹی دہشت گردی ملک اٹی نزوری ودی کننگ نا ناپاک ایجنڈا نا بشخ اسے۔ ارض وطن ءِ دہشت گردی نا لعنت آن پاک کینہ۔ شہید آتا قربانی تے سلام پیش کینہ۔ وزیراعظم دعا کرے کہ اللہ تعالیٰ شہید آتا درجہ غاتے بڑز کے و خاہوت ءِ صبر وجمیل عطاکے۔ وزیراعظم ٹھپی تا زوت دراخ جوڑی کن دعاہم کرے۔ صدر مملکت ڈاکٹر عارف علوی بولان اٹی بلوچستان کانسٹیبلری نا وین آ خودکش جلہو نا ترندی اٹ مذمت ءِ کرسا پارینے کہ دہشت گرد آک تینا ناپاک عزم اٹی اسُل سرسہب مفسہ، ملک آن دہشت گردی نا لعنت ءِ زوت چٹفنہ۔ ایوان صدر نا پریس ونگ انا رداٹ صدر مملکت جلہو اٹی نہادی جان تا زیان آ ڈکھیائی و است ہسونی نا درشانی ءِ کرے۔ اوشہید آتا خاہوت آتون است ہسونی نا درشانی ءِ کرے و ٹھپی مروک آتا زوت دراخ جوڑی کن دعا کرے۔ داکان بیدس ترجمان حکومت بلوچستان فرح عظیم شاہ بولان کمبڑی پول انا خڑک بلوچستان کانسٹیبلری نا گاڈی آ دھماکہ نا ترندی اٹ مذمت ءِ کرسا پارے کہ شہید کارندہ غاتا خون زیان مفک۔ داڑے جاری مروک اسہ بیان اسے ٹی ترجمان پارے کہ دہشت گرد آک تینا ناپاک مسخت آتیٹی اسُل سرسہب مفسہ دہشت گرد آتا بیخ ءِ کشنگ المی ءِ الس تینا فورس آتون تفوک ءِ۔ ترجمان پارے کہ داوڑنا لغوری کارروائی تے اٹ فورس آتا حوصلہ ءِ شیف شاغنگ مفک۔ اوشہید کارندہ غاتا درجہ غاتا بڑزی و خاہوت کن صبر و جمیل نا دعاکرے۔

(اے پی پی)