صوفی رنگ(3)
Get real time updates directly on you device, subscribe now.
(صوفی رنگ پنی آ دا بشخ اٹی پنی آ صوفی بزرگ شاعر آتا کلام نا براہوئی منظوم ترجمہ غاتے پیش کننگک۔ تاکہ خوانوک آک اوفتا فکر انا بڑزی و کلہو آن واخب مریر: پروفیسر حسین بخش ساجد)
بلھے شاہ:۔
تصور نا چاہوک آ عالم آتا رد اٹ بلھے شاہ صوفی شاعر آتیٹی کل آن بھلا و پنی آ صوفی شاعر ءِ۔ ہندن پنجاب نا ہم بھلا و شرفدار آ صوفی شاعر ءِ، ہرا کہ تصوف نا تعلیم ءِ مچ آ راج اٹی عام کرے۔ سید خاہوت نا داپنی آ شخصیت، پیران پیر شیخ عبدالقادر جیلانی تون چانڑدہ پشت اٹی اوار تمک۔
بلھے شاہ کہ اونا اصلی آ پن عبداللہ ءِ، و اونا باوہ ناپن سخی محمد درویش ءِ۔ مغل بادشاہ اورنگزیب نا دور 1640ء اٹی اُچ گیلانیاں، ضلع بہاولپور اٹی ودی مس۔ ولے اونا زند انا دیک گیشتری قصور اٹی تدینگار۔ و زند انا گڈیکو دے تے ہم ہموڑے گدریفسا 1757ء اٹی دا کوڑی آن موکل کرے۔
بلھے شاہ نا کلام آتیٹی کافی، بارہ ما، ستارہ، دوھڑہ، و سی حرفیک اوار ءُ۔
بلھے شاہ تصوف نا علم اتون اوار اوار فقہ، حدیث، منطق و معانی ہم ہیل کرے۔ اونا کلام اٹی انسان دوستی، مہر و مریبت، سنت و سیوت، خذمت خلق، ایلمی، دوستی، اسٹی و اواری نا کلہو سبخ ارے۔ ہندن اونا کلام آتیٹی قرآنی آیت، و حدیث آتا ہم جاگہ جاگہ حوالہ ساڑی ءِ۔ وحدت الوجود نا رد اٹ ابن عربی نا منوک اسے۔ عشق حقیقی، فنا فی اللہ، فنا فی الرسولؐ و مخلوقِ خدا تون مہر اونا شاعری نا گچین آ سرحال آک ءُ۔ بلھے شاہ نا صوفیانہ و عارفانہ شاعری ٹی خیال آتا کڑمبی و پختئی تون اوار تصوف نا رمز و ویدن و انسانیت تون مہر انا درشانی رسینگک۔ بلھے طب انا رداٹ بھاز عابد و زاہد ءُ بزرگ و درویش اس ئس۔ ولے اونا طبیعت اٹی جذب و شکر، عشق و محبت، وجد سماع نا کیفیت ہم زیات ئس۔ ہندا سوب آن اونا کلام و کافیہ غاتیٹی عنائیت و نغمی و موسیقیت مننگ نا سوب آن کلام پاروک آک اونا کافی و سی حرفی و ایلو عارفانہ و صوفی کلام آتے تینا توار تیٹی پارسا اونا فکر ءِ لس مخلوق اسکان سر کیرہ۔ تصوف اٹی وحدت الوجود ءِ منوک آ دا بے مٹ آ بزرگ و صوفی شاعر صوفیا تیٹی بھلو پن و شرف تخوک ءُ شخصیت اسے۔
کلام بلھے شاہ:۔
نئے کہ مومن، نئے ای مسلمان اریٹ
نئے کہ واخب ای کفر و جفا غان اریٹ
نئے ای پاک آتیٹی پاک اریٹ
نئے ناپاک آتیٹی ناپاک اریٹ
…………
نئے ای موؑسیٰ و نئے فرعون اریٹ
بلھے شاہ ای ہچ تپرہ دیر اریٹ
…………
نئے چاہوک اریٹ مذہب و دین انا
نئے ای چاوہ نشہ ءِ، نئے میخوار اریٹ
نئے ای رند اسے اُٹ چا میخانہ نا
نئے تغ اٹی اریٹ، نئے سما ءِ کنے
بلھے شاہ ای ہچ تپرہ ای دیر اریٹ
…………
کنے خوشی و غم تتون مطلب اف
کنے پاک و ناپاکی تون مطلب اف
نئے خاکی بدن، ای نئے حاجی اریٹ
نئے ہوا نئے ای واخب عشق انا خاخر آن
بلھے شاہ ای ہچ تپرہ دیر اریٹ
…………
نئے ای دین انا راز آن واخب اریٹ
نئے اولادِ آدم نئے حوا اریٹ
اریٹ بے پن اس ہچ ءُ پن اس اف کنے
نئے کہ حرکت اٹی نئے کہ جامد اریٹ
بلھے شاہ ای ہچ تپرہ دیر اریٹ
…………
کہ اول و آخر اریٹ بیرہ ای
محبت نا شرک آن بلد افٹ ای
جہان اٹ کنے آنبار چاہوک ءُ اف
نی خدا اُس، نی رانجھا، نئے کھیڑا کس اس
بلھے شاہ ای ہچ تپرہ دیر اریٹ
ہفتئی تلار
تاک: 41
24-30 Oct, 2020
پنہ: 04