سیرت سرور کائناتؐ(18)

خواجہ دو عالمؐ ا نا پیدائش نا پیش گوئیک

پیل والا واقعہ غان کل جہان معلوم مس

بیت ربی شان والا ابرہہ دن شُوم مس

وا نجومیک رمل خلکُر او بریک دُن حساب

انقلاب اس زُو برو ءِ اوفتا پاریکہ جواب

بیت انا عزت و ہیبت کنڈ و کنڈ تالان مس

دُن قریش ءِ رب تعالیٰ تِس عزت شان مس

بندغ اس اعلےٰ گچین ءُ زو قریش آن ءِ ودی

اونا عزت شان داخس او مرو بیشک نبیؐ

انجیل و تورات والا دا نشانی تے خنار

او بشارت ءِ نبیؐ نا خوڑتی اٹ مون آ تخار

سیف بن زی یزن اٹ دُن حبشہ مس ختم

خوش مَسُر مکہ والاک ایڑے بسک وا ہتم

جاہ نشین آ دُن یمن نا وا قریش وفد اس درے

ئس کماش اونا مُطلب رہبری ءِ تے کرے

سیف تِس اودے مبارک بن، مُطلب جوان چاس

اے نبیؐ نا اولیاد آن ءِ دادے تین کن شان چاس

دُن ہمو تم رب تعالیٰ ِتس استار تے حکم

آسمان آ بسر شیطانک اوفتے کربو نم ختم

تاکہ حوال آسمان تا کاہن آتے سر مفس

جاہل آ مخلوق ءِ ولدا ہندا حوال ءِ تِفس

وا مُطلب تُغ اس جوان ءُ وخت اٹی ہمو خنا

معنہ کن تے وخت انا او بھلّا عالم تیا ہنا

دُن خناٹ پارے بج آن کَہ مس زنجیر اس عیان

چار لڑ مس راست و چپ آن شیف بڑزا دُن خنان

دے ٹک ءِ ہرفے لڑ اس تے کی ہلینگ آ مون کرے

ایلو لڑ تے آسمان آ ایلو ڈغار ءِ شون کرے

جٹ اسے آن پد گُڑا مس دا درخت اس زیبدار

پن و پن تے ئس روشن ئسکہ دُن نور دار

چانڑدہ نا توبے آن زیادہ نور اونا ئسکہ

مشرق و مغرب نا خلقت رُم اٹ اوڑا بَسّکہ

اوڑا لِچّوک ہم قریش آن خلقت ءِ تینا خناٹ

اوڑان بھاز آک مُر سلوک ءُ غرغشارہ ای ہُراٹ

او قریش آن ئسُّرہ کہ دادے گڈن نن بٹن

دا امر زیبا سلوک ءِ داڑا انتئے نن ہُرن

ورنا اس زیبا سلوک ءِ رکھ اَکنِ دانا خناٹ

او ِمڑا کہ اوفتے دا کان جُو کروک آتے ہُراٹ

تُغ ءِ اونا معنہ دان آک دا وڑ اٹ ہبو کریر

بخت والا نا ءِ اولیاد تُغ دا اوڑکنؐ اریر

پُشت اٹی نا دُن گچین ءُ بندغ اس پیدا مرو

دے ٹِک و دیکی نا مخلوق اِتباع اونا کرو

دُن ڈغار اٹ آسمان اٹ ذکر خیر اوؐ نا پن آ

شیف والا بڑز والا پار درود اوڑکن ثنا

وختی ءُ دشمن قریشان اوڑکن ہم پیدا مریک

بھاز ایتر اوڑکن کاٹم بھاز کس شیدا مریک

او حقیقت نا کسر تے کل اَکن ہندن ملو

نور اونا وخت اسے ٹی کل دنیا ءِ ہلو

صد مبارک نے مُطلب تغ نا اعلےٰ و گچین

شان والا نا اے اولادؐ اُست نا مسک پدین

ہفتئی تلار
تاک: 41
24-30 Oct, 2020
پنہ: 05