زندان نا ڈائری(سال 1973ء)…………14

ڈسٹرکٹ جیل نا اسیر آک

ملک عبدالرسول لہڑی:۔ 

ملک عبدالرسول لہڑی نیپ انا سرگرم ءُ راہشون اس ئس، اونا تعلقداری سریاب نا کلی احمد خان زئی آن ئس۔ سریاب نا بلوچ متبر آتیان ئس۔ ننا جیل فیلو و سنگت ولی محمد لہڑی نا باوہ نا اِلہ نا مار ئسکہ۔ پنجا نا دھائی نا بنا ٹی سریاب نا ورنا تے اسہ پلیٹ فارم اسے آ مچ کرسا انجمن نوجوانان سریاب نا پن اٹ فلاحی و شونداری کاریم تیٹی جوان پبی بشخ ہلک۔ او دا انجمن نا پلیٹ فارم آن زمانہ نا ترند انگا شونداری ءِ مون آ تخسا دانا بھرم ءِ خلق آتسکان تالان کننگ نا گرج آ زور شاغنگ کن کیہی دیوان اڈ ترفے۔ سریاب نا خلق آتیٹی کشت و کشار نا بابت چندی دیوان تے کرفے۔ سریاب نا خلق آتیٹی کشت و کشار ءِ پوسکن آ وڑ تتون ہم گرنچ کرفنگ کن کشارگر تتون رابطہ تخنگ نا کوشست کرے۔ او خواری اٹ پیداوار ودفنگ نا پاریکہ، و شاری زند انا آسراتی و آسودہی تیان فائدہ ہرفنگ نا کوشست آتے شونداری نا لڑی ٹی خُلنگ ءِ المی گوندسا ہر شار، ہر خلق اٹی مہر انا تبلیغ کریکہ۔ سیاسی رد اٹ او بلوچستان نا دوستخواہ سیاستدان آتتون خڑکی نا سوب آن استمان گل آن نیشنل عوامی پارٹی اسکان مستقل مزاجی اٹ سیاست نا سخت انگا پڑ آ سرگرم ئس۔ نواب اکبر خان بگٹی نا خڑک انا سنگت آتیان ئس۔ ریل و جیل انا متکن ءُ گوازی گر اس ئسکہ۔ ایوبی آمریت نادور اٹی ملک عبدالرسول لہڑی کنا باوہ و اونا ایلم تتون اوار کیہی وار جیل انا چکر ءِ خلکوسس۔ داسہ او نن تون ہم بندی ئس۔ داسہ دا وئی اٹی ہم اودے کھمبہ غا لگفسا ٹیلفون نا تار تے گڈنگ نا دوبہ ٹی دزگیر کننگاسس۔

عبدالرحمن لانگو:۔ 

عبدالرحمن لانگو نا تعلقداری کلی اسماعیل آن ئس۔ ننا سرگرم آ کارندہ مجید لانگو نا اِلہ ئسکہ۔ سیاسی ہمدردی نا رد اٹ نیشنل عوامی پارٹی آن خڑک ئس، واپڈا ٹی لائن مین ئسکہ۔ اودے گورنر ہاؤس نا ٹاسفارم ءِ خراب کننگ نا دوبہ ٹی دزگیر کننگاسس۔

آغا عبدالمجید شاہ :۔ 

آغا عبدالمجید شاہ نا تعلقداری نیشنل عوامی پارٹی آن ئس۔ او نیپ بلوچستان نا سالار ئس۔ کوئٹہ نا کیبی علاقہ ہدہ ٹی ہنکینی ئس۔ قوم پرست سیاست اٹی پارٹی ٹی اسہ متبر ءُ ہند اسے نا خواجہ ئس۔ 1970ء نا گچین کاری تا وخت آ الیکشن نا سرگرمی تیٹی بے کچ متحرک ئس۔ 60 سال ناس ئسکہ۔ و کوٹ بیناکہ، ہراڑان او روسی کامریڈ اس خننگاکہ۔ و کوٹ آ نیپ انا بیج اس خلوک ئس، و جیب اٹی خیسن ءُ رومال اس تخاکہ۔

اکبر اچکزئی:۔ 

محمد اکبر اچکزئی نیشنل عوامی پارٹی نا متحرک ءُ ورنا کارندہ اس ئسکہ۔ اونا جیل کارندہ غاتتون لگتوکہ۔ جوزہ ٹی بروک اس مننگ نا سوب آن او ہر اسٹ تون بُک لگاکہ۔ علی احمد کرد انا جلسہ نا وخت آ دوٹی تماسس۔

کریم اچکزئی:۔ 

کریم اچکزئی پشتون اسٹوڈنٹس فیڈریشن نا متحرک ءُ کارندہ اس ئس، سائنس کالج کوئٹہ ٹی خواناکہ۔ اونا تعلقداری سیاسی خاہوت اسے آن ئس۔ اونا باوہ بزرگوار یوسف پیر علی زئی پشتون تیٹی پنی ءُ سیاستدان اس ئسکہ۔ او بھلو وخت اسے آن اوغانستان اٹی جلاوطنی نا زند تیر کننگ ئس۔ اونا مچ آ خاہوت باچا خان نا عقیدت مند و نیشنل عوامی پارٹی آن تعلقدار ئسکہ۔

کریم اچکزئی طالب علم برانز نا وخت آ نن تون اوار دزگیر مس۔

یونس کاسی:۔ 

یونس کاسی نا تعلقداری پشتون اسٹوڈنٹس فیڈریشن آن ئس۔ سائنس کالج کوئٹہ ٹی خواناکہ۔ یونس کاسی پشتون زلمئے نا صوبائی کمانڈر خدائیداد نا چنکا ایلم ئسکہ۔ یونس کاسی ہم برانزی تحریک نا دے تیٹی نن تون اوار سائنس کالج آن ہلنگاسس۔

ولی محمد لہڑی:۔ 

ولی محمد لہڑی کلی احمد خان زئی سریاب برمہ ہوٹل نا رہینگوک اس ئس، ملک عبدالرسول لہڑی و نیپ انا سرگرم علاقائی راہشون شفیع محمد لہڑی (بابے لہڑی) نا خاہوت آن ئس۔ اسپیشل ہائی اسکول اٹی جماعت دہم نا طالب علم ئسکہ۔ کنا کلاس فیلو و بی ایس او نا سرگرم ءُ کارندہ اس ئسکہ۔ جلسہ و جلوس آتیٹی مون نا چر تیٹی ئس، واسُل بے خلیس ءُ کارندہ اسے نا وڑ اٹ پنی ئس۔ کنا خڑک ءُ سنگت اس ئس۔ ولی محمد لہڑی ہم طالب علم برانز نا وخت آ پولیس نا دوٹی تماسس۔

ہفتئی تلار
تاک: 41
24-30 Oct, 2020
پنہ: 02