پاکستان کشمیری الس نا بنداوی حق آتا رکھ اکن کڑد ادا کرسا کیک ،بنجائی کانودوزیر

بنجائی وزیر کانود، انصاف و انسانی حق سینیٹر اعظم نذیر تارڑ پارینے کہ 5 اگست 2019 نا تینا خود آن کروک گام گیج آک نئے بیرہ ڈیہہ انا حالیت آتے اسہ پوسکن ءُ ریسہ سے ٹی اوار کریر بلکن جموں و کشمیر نا الس نا بنداوی حق، شناخت و آخبت نا بابت اہم کانودی و انسانی پالو تے ہم پین نمان کریر، حکومت پاکستان و مچ آ پاکستانی قوم انا کنڈآن جموں و کشمیر نا الس تون تینا پورو یکجہتی نا درشانی ءِ کینہ۔ یوم استحصالِ کشمیر نا وخت آ جاری کلہو اٹ بنجائی وزیر سینیٹر اعظم نذیر تارڑ پارے کہ اینونادے ننے یات ترفک کہ جموں و کشمیر نا الس دہائی تیان مشکل، بے پک حالیت و تینا بنیادی حق آتا بابت چیلنج آتون مون تننگ ءُ، اوفتا امن، انصاف و تینا روا حق آتا دوئی کننگ نا استخواہی جہانی برادری نا سنجیدہ چکار نا خواہندار ءِ۔ بنجائی وزیر انسانی حق انا حیثیت اٹ کنا پکا یخین ءِ کہ انسانی حق آفاقی، بشخنگپروک و ہر انسان نا بنداوی حق ءِ، ہر بندغ ءِ بے فرق عزت، بریبری، آجوئی و کانود نا بریبر رکھ اتون زند ءِ گدریفنگ نا حق دوئی ءِ۔ او پارے کہ پاکستان تینا اصولی موقف آ سلوک ءِ کہ جموں و کشمیر نا ویل انا انصاف اٹ و مدامگی ایسری اقوامِ متحدہ نا سلامتی کونسل نا تعلقدارقرارداد و کشمیری الس نا است خواہی تا رداٹ مننگ کیک۔ پاکستان کشمیری الس نا اخلاقی، سیاسی و سفارتی مخ تفی ءِ برجا تخک و اوفتا بنداوی حق آتا رکھ اکن ہر جہانی فورم آ تینا کڑد ءِ ادا کرسا کیک۔ ببو، یومِ استحصالِ کشمیر نا وخت آ نن انصاف، انسانی وقار، امن و کانود نا بالادستی کن تینا عزم انا دوارگی ءِ کین و دعا کین کہ ہمودے زوت برے ہراتم جموں و کشمیر نا الس امن، آجوئی و وقار اٹ تینا زند ءِ گدریفنگ کے۔