بھارت نا 5 اگست 2019 نا کانود آن چَپ گام ءِ منپنہ، خالد حسین مگسی
Get real time updates directly on you device, subscribe now.
بنجائی وزیر سائنس و ٹیکنالوجی خالد حسین مگسی پارینے کہ بھارت نا کنڈآن 5 اگست 2019 آ مقبوضہ جموں و کشمیر نا خصوصی آئینی حیثیت ءِ چٹفنگ نا کانود آن چَپ گام گیج منپنہ و پاکستان دا گام ءِ مسترد کیک۔ یومِ استحصالِ کشمیر نا وخت آ تینا کلہو اٹ او پارے کہ کشمیر نا باندات آ پاکستان نا اصولی موقف اٹ ہچ ءُ سمجھوتہ اسے نا گنجائشت اف، کشمیری الس نا آجوئی و حق خود ارادیت نا مخ تفی ننا قومی پالیسی نا آخبتی بشخ ءِ و پاکستان ہر کہول آ اوفتا روا حق و انصاف نا جہد انا مخ تفی ءِ برجا تخک۔ بنجائی وزیر پارے کہ بھارت نا تینا خود آن کروک گام گیج انسانی حق، جہانی کانود، اقوامِ متحدہ نا چارٹر و سلامتی کونسل نا تعلقدار قرارداد آتا پاش آن پاش خلاف ورزی ءِ، جہانی برادری بایدے مقبوضہ کشمیر اٹ انسانی حق آتا حالیت نا نوٹس ءِ ہلے و کشمیری الس ءِ اوفتا بنداوی حقِ خود ارادیت دوئی کننگ کن کڑد ادا کے۔ خالد حسین مگسی پارے کہ پاکستان ہر قومی و جہانی فورم آ کشمیرنا ویل ءِ پبی وڑ اٹ تالان کرسا کیک و تینا اصولی موقف آن اسُل پدی مفک۔ او دا عزم انا درشانی ءِ کرے کہ پاکستان مدام کشمیری الس تون اوار سلک و اوفتا سیاسی، سفارتی و اخلاقی مخ تفی ءِ برجا تخک۔