پیسہ غاتا سوب آن ہاکی فیڈریشن سیاست نا گواچی مسنے‘ مدثر اصغر

 لاہور(مانیٹرنگ ڈیسک) مسکوہی سیکرٹری پاکستان ہاکی فیڈریشن نا کرنل (ر) مدثر اصغر پارینے کہ پیسہ غاتا سوب آن ہاکی فیڈریشن اٹ سیاست بسنے۔ پاکستان ہاکی فیڈریشن نا مسکوہی سیکرٹری کرنل (ر) مدثر اصغر پارینے کہ پیسہ غاتا سوب آن ہاکی فیڈریشن اٹ سیاست بسنے، خالد سجاد کھوکھر و آصف باجوہ تون اوار ایلو بندغ آک پاکستان ہاکی ءِ جوان کننگ نا اہل افس، داکان مست ہم ہراتم آصف باجوہ ہاکی فیڈریشن اٹ بس او وخت آ اونا بننگ سہی الو، او وخت اس کہ کوچ و وخت اس سیکرٹری جوڑ مرسا مون آ بسکہ ولے رزلٹ نما مون آٹے۔ مستی مدثر اصغر پارینے کہ ہندا بندغ آتا ساڑی گری ٹی 20 سال آن قومی کھیل ہاکی نا جوانی کن ہچ ءُُ کاریم اس متنے، مستی ہم دُن انگا بندغ آتیان اومیت اف، داکان مست شہباز سینئر ہم بے سہب سلیس، او بھاز جوان ءُُ گوازی گر ئس ولے او جوان ءُُ ایڈمنسٹریٹر اس مننگ کتو۔ مدثر اصغر نا رداٹ مالو فیڈریشن نا صدر یا سیکرٹری پیسہ ہلتوسہ، دا عہدہ غاک بایدے اعزازی مریر، اگہ لکھ آ روپئی تنخواہ تروئی ءِ تو پیشن آن بندغ آتے معاملہ غاتا جوانی کن بایدے اتنگے، ساڑی صدر پی ایچ ایف بریگیڈئیر ریٹائرڈ خالد سجاد کھوکھر فنڈ آتے مچ کننگ کتوس، قومی آ گوازی نا شونداری اوفتا وس انا کاریم اف، ہاکی نا جوان ءُُ ٹیم اس جوڑ کننگ کن ہر سال کم از کم اسہ ارب نا گرج ءِ۔