سپریم کورٹ نا گچین کاری تا بابت پرمان آ حیرت ءِ، مولانا فضل الرحمن

اسلام آباد : جمعیت علمائے اسلام نا سروک مولانا فضل الرحمن پارینے کہ سپریم کورٹ ناکنڈآن 90دے اٹ گچین کاری کرفنگ نا پرمان آ حیرت ءِ۔ خیبرپختونخوا ٹی دہشت گردی نا واقعہ غاک مننگ ءُ‘ دا وڑ انا حالیت آتے ٹی گچین کاری مہم چلیفنگ مفک‘ عمران خان و اونا سنگ آتے تحریک چلیفنگ نا جیرت اف‘‘ سیساتدانک جیل آتیان خلپسہ‘ ساڑی حالیت آتے ٹی نگران حکومت آتا مُد اٹ ودکی کننگے۔ یک شنبے نادے اسلام آباد اٹ پریس کانفرنس آن تران کرسا مولانا فضل الرحمن پارے کہ دا وخت آ ملک انا ہرا سیاسی حالیت آتے پیش کننگ انگ ءِ ننا نظر اٹ دا اصل حالیت آک داڑان چَپ ءُ‘ اوپارے کہ نن مدام عدالت آتے شرف تسونن و آئین و ریاست تون سلوک ان‘ او پارے کہ ساڑی حالیت آتا خواست دادے کہ نگران حکومت آتا وخت ءِ بے وخت اسکان برجا تخنگے‘ اوپارے کہ ننے ریاست ءِ مون تروک حالیت آتے ہروئی ءِ و دا حالیت آتے ٹی نن خن تے چَپ کپنہ۔ اوپارے کہ دا وخت آ ارا صوبہ ٹی اسمبلی اف و ہڑتوم آتا پننگ و گچین کاری شیڈول ہم اسٹ اف و ہڑتوم آ اسمبلی تا گچین کاری تاتاریخ تننگ نا واکداری اسہ بندغ تون اف‘ او پارے کہ مردم شماری ہم مننگ اٹی ءِ و دا ہڑتوم آصوبہ غاتے ٹی گچین کاری متکن آ مردم شماری آ مریک وخت اس کہ ایلواِرا صوبہ ٹی گچین کاریک پوسکن آ مردم شماری آ مریرہ۔ اوپارے کہ دا اسمبلی تے وزیراعلاک پرغانو یا اسہ لیڈر اسے نا پرمان آ عمل کننگانے‘ ننے دادے ہم ہُروئی مریک وگڑا نن پاکستان نا سیاست ءِ دا وڑ کینہ‘ او پارے کہ ننے دا گڑاتا تعجب و حیرت ءِ کہ سپریم کورٹ گچین کاری شیڈول نا بابت از خود نوٹس ہلک وخ کہ جولائی 2018 ٹی ہم و گچین کاری تا برخلاف ملین مارچ مس ہمو وخت آ ہم ازخود نوٹس ہلنگاکہ‘ دا امر ءُ خف ءُ کہ او 15لکھ بندغ نا توار ءِ بنپسہ۔ او پارے کہ ہندا سپریم کورٹ ئس ہرا جنرل مشرف ءِ مسہ سال اٹ گچین کاری کرفنگ نا موکل تسوسس‘ ہندا سپریم کورٹ آئین اٹ ترمیم نا واکداری ءِ اسہ بندغ اسے تسوسس‘ اوپارے کہ عمران خان نا مسہ نیم سال انا حکومت ملک ءِ ہراڑے سرکرینے‘ اینو آئی ایم ایف ننا بجٹ ءِ جوڑ کننگ اٹی ءِ و ننا نہاد آتے کنٹرول کننگ اٹی ءِ‘ الس ءِ سما اف کہ ہرا وڑ ننا اسٹیٹ بنک ءِ آئی ایم ایف نا دوٹی تننگانے اگہ اسٹیٹ بنک نا صدر تینٹ ہم پاکستان نا حکومت و ریاست نا احترام ءِ کے تو دا اونا واکداری ءِ۔ او پارے کہ اینو اگہ غریب آتے حکومت ارغ تننگ کپک‘ ملک اٹ سوزیک کبین مسنو وننے گچین کاری تیکن 80ارب روپئی تننگ نا پاننگ انگ ءِ‘ او پارے کہ اگہ کس اس نن تون کمک کننگ خواہک تو آئی ایم ایف نیام اٹ بریک۔ اوپارے کہ ننے سماءِ کہ بیرہ پاکستان ءِ انتئے شست کننگ انگ ءِ۔ او پارے کہ اسہ کنڈآ پاننگ انگ ءِ کہ ملک اٹ بدامنی ءِ ہر ڈے پولیس چوکی تیا جلہو مننگ اٹی ءِ و دا حالیت آتے ٹی گچین کاری مہم چلیفنگ مفک۔

(آن لائن)