کنے عدالت آ درو اٹ بٹنگسا کسفنگ نا سازش مننگ ءِ، عمران خان

لاہور : چیئرمین تحریک انصاف عمران خان پارینے کہ ای اللہ غان بیدس کس انا مون آ کاٹم ءِ شیف کپرہ و نئے کارندہ غاتے کاٹم شیف کننگ کن الوہ‘ دافک کنے دروغ نا مقدمہ غاتے عدالت اٹ بٹنگسا کنے خلنگ خوارہ‘ اینو ای اسہ مچی اسے پورو ءُ قوم اس جوڑ مننگ آ خننگ اٹ‘ اگہ قوم دز آتا برخلاف بش متو تو ننا ہچ ءُ آخبت اس اف‘اینو پاکستان آ بد ءُ وخت اسے‘ زرگزران ڈبینگانے۔ عمران خان خواست کرے کہ کنا توشہ خانہ کیس ءِ ٹی وی آ بننگے‘ کنا جان ءِ خطرہ ارے‘ کنا وکیل چیف جسٹس آچٹھی راہی کیک‘ عدالت آتے ٹی کنے چکر خلفنگ انگ ءِ‘ ہچ ءُ سکیورٹی اس اف‘ چیف جسٹس آچٹھی راہی کننگک کہ زموار دیر ءِ وار آ کنے جعلی کیس اٹ بٹنگ انگ ءِ۔ دا خیال آتا درشانی ءِ لاہور زمان پارک اٹ کارندہ غاتیان تران کرسا کرے‘۔ عمران خان پارے کہ ای اللہ غان بیدس کس انا مون آ کاٹم ءِ شیف کتنٹ و کارندہ غاتے ہم کاٹم شیف کننگ کن الیپرہ‘ کارندہ غاک ہرا وڑ جیل بھرو تحریک اٹ بشخ ہلکر‘ 26 سال انا تحریک اٹ اینو ہرا وڑ کارندہ غاتاجوزہ ءِ خناٹ داڑکن اللہ نا شکر ءِ ادا کیوہ‘ جوزہ غاتے اسہ قوم اس مننگ آ خننگ اٹ۔ عمران خان پارے کہ شہباز شریف مچ آدنیاغان پیسہ خواہنگ اٹی ءِ و اودے کس اس پیسہ تفننگ ءِ‘ اللہ نا حکم ءِ کہ راست و راستکی تون کمک کبو و گندہ ئی تون جنگ ایتبو تاریخ اٹ پاکستان نا دا وڑ حال بدمتنے‘ دانا سوب ساڑی حکومت ءِ‘ او پارے کہ شہباز شریف ءِ کیس تے ٹی سزا مسکہ ولے جنرل (ر) باجوہ اودے بچفسا وزیراعظم جوڑ کرے‘ وزیرداخلہ رانا ثناء اللہ غان بھلو بدمعاش اف ہرا 18 خون کرینے، آصف زرداری ہرا پد اٹ تولوک گوازی کننگ اٹی ءِ او تینا مخالف آتا خون ءِ کرینے‘ مرتضی بھٹو نا خاہوت اینو ہم پاننگ اٹی ءِ کہ مرتضی ءِ آصف زرداری خلفے‘او ہم ارب آ روپئی تا دزی ٹی ہلنگاکہ ولے اودے باجوہ بچفے۔ او نواز شریف آ تنقید کرے وپارے کہ او دز پیشن تولوک ملک انا فیصللہ غاتے کننگ اٹی ءِ‘ ہراتم ملک انا بھلا دز آک اسیجا مریرہ گڑا ملک دیوالہ مفک تو امر مریک؟ عمران خان پارے کہ ہرا قوم اتون گندہ ئی تتون جنگ تننگ نا وس مفک ہمو قوم مے جوڑ مریک‘ کربلا ٹی کوفہ نا نبدغ آتے سما ئس کہحضرت امام حسین حق آٹے ولے او یزیدنا خلیس آن اسلام نا تاریخ نا کل آن بھلا بیدادی ءِ مننگ کن الار۔

(آن لائن)