پولیو کارندہ غاتا خذمت آک گیرام مننگ کپسہ، عائشہ زہری

نصیرآباد: ڈپٹی کمشنر نصیرآباد عائشہ زہری پارینے کہ پولیو ورکر آتا خدمت آک ستا کڑزرہ۔ پولیو مہم اٹی فرنٹ لائن آ کاریم کروک آ ورکر آک خراج تحسین کڑزرہ۔ ملک ءِ پولیو دین آن پاک کننگ کن اوفتا جہد ءِ ہر وخت یات تخنگک۔ نوکاپ آن ہراڑے ایلو بندغ آک زہمی مسنو تو اوڑے پولیو ورکر آک ہم نوکاپ نا بھسکاری آن بچنگ کپسہ۔ بل گیٹس فاؤنڈیشن نا کنڈآن نوکاپ نا زہمی آ پولیو ورکر آتیٹی مالی کمک نا فراوانی ستا کڑزک۔ دا خیال آتا درشانی ءِ او نوکاپ نا زہمی آ پولیو ورکر آتیٹی چیک بشخ وپانٹ کننگ نا وخت آ ہیت وگپ کرسا کرے۔ او وخت آ ڈسٹرکٹ ہیلتھ آفیسر ڈاکٹر عبدالمنان لاکٹی پی پی ایچ آئی نا ڈی ایس ایم فیصل اقبال کھوسہ این اسٹاف ڈاکٹر عبدالغفار سولنگی ڈبلیو ایچ او نا ڈاکٹر شیر محمد سنجرانی و بابو محمد اعظم بہرانی ہم ساڑی ئس۔ ڈپٹی کمشنر نصیر آباد نوکاپ آن زہمی آ نرینہ و نیاڑی پولیو ورکر آتیا جتا جتا پیسہ غاتا چیک آتے بشخ وپانٹ کرے۔ ڈپٹی کمشنر عائشہ زہری پارینے کہ پولیو ورکر آک پولیو آن بیدس ایلو طبی کمک نا فراوانی ٹی برجا انگا مہم اٹ بھلو کچ اسے ٹی کڑد ادا کیرہ۔ کورونا ویکسینیشن مرے یا چناتے جتاجتا ہلوک آ ناجوڑی تیان رکھوک کننگ کن ایلو ٹیکہ جات نا مہم کل آن ودسا بشخ ہلیرہ۔ وخت اس کہ مچ آ ضلع ٹی جانجوڑ ءُ راج اسے نا جوڑی کن تینا بھلو کچ اسے ٹی خدمت کننگ اٹی ءُ۔ انتظامیہ پولیو ورکر آتا خدمت آک ستا کڑزرہ۔ ورکر آتا بنداوی ویل آتا ایسری کن ہر فورم آ گام گیج کننگک۔

(خ ن)