آرچر پاکستانی گوازی گرتے فریشان کیک‘ یونس خان

 لاہور (مانیٹرنگ ڈیسک) یونس خان جوفرا آرچر ءِ پاکستان ٹیم اکن کل آن بھلا خلیس پن کرے۔ بیٹنگ کوچ پارینے کہ ورنا غا انگلش پیسر سوگو ءُ سوچ اس تخک۔ مہمان بیٹسمین تے خطرناک انگا انسوئنگر آتے بیک فٹ آ گوازی کننگ نا سلاہ ایتوہ، دورہ ٹی پاکستانی بیٹنگ نا تکنیک و اعصاب ہڑتوم آتا امتحان مریک، خشک انگا مُد اٹ جیمز اینڈرسن و اسٹورٹ براڈ زیات ویل ودی کننگ کپسہ۔ حوال نا رداٹ پاکستانی بیٹنگ کوچ یونس خان ٹیم ءِ جوفرا آرچر آن خبردار کرینے، او پارینے کہ ورنا غا پیسر بھاز خطرناک ءِ، ٹور میچ اٹ اوڑتون مون مقابل مسٹ، او وخت آ باولنگ اٹ تے داخس کاٹ الو، ولے ورلڈکپ فائنل نا سپر اوور اٹ او نشان تس کہ سوگو ءُ اعصاب اسے نا مالک ءِ، ہائی آرم ایکشن نا سوب آن آرچر کن بیٹسمین ءِ دھوکا تننگ آسان و ان سوئنگر ہم خطرناک ءِ، ای بیٹسمین تے سلاہ ایتوہ کہ اوفتے لائن اٹ بننگ آن پد بیک فٹ آ گوازی کننگے، کنا خیال اٹ میچ ونر باولر پاکستان ٹیم کن کل آن زیات خطرناک مریک۔ یونس خان پارینے کہ جیمز اینڈرسن و اسٹورٹ براڈ نا جوڑی بھاز آزموندہ کار ءِ، ہڑتوم آک اواری ٹی انگلینڈ نا سرسہبی ٹی اہم ءُ کڑد ادا کرینو، انگلش کنڈیش دا مُد اٹ خشک مریک، اومیت ءِ کہ ہڑتوم آ پیسر آک پاکستانی بیٹنگ لائن کن زیات سختی ودی کننگ کپسہ۔ او پارینے کہ انگلش بولر تے چیلنج تننگ کن المی ءِ کہ مہمان بیٹسمین 300 آن 350 اسکان نا ٹارگٹ اس تننگے۔ کنڈیشنک ہر وخت سخت و تکنیک و اعصاب ہڑتوم آتا امتحان مریک، اومیت ءِ کہ ٹیم دا چیلنج تون مون تننگ اٹ سرسہب مریک۔