برازیل اٹ فٹ بال اسٹیڈیم سینما اس جوڑ

برازیلیا (مانیٹرنگ ڈیسک) برازیل اٹ اسہ فٹ بال اسٹیڈیم اسے ڈرائیو ان سینما ٹی بدل کننگانے۔ حوال نا رداٹ کورونا وائرس نا کاختی آن بھاز زہمی آ ملک اٹ اُلس نا جوزہ غاتے ولدا بحال کننگ نا کوشست کرسا سیمی شار سا پولو نا پلمئیرس فٹ بال کلب نا اسٹیڈیم ءِ سینما اس جوڑ کننگانے۔ ہراڑے سے سد کار انا گنجائشت مریک۔ دا ڈرائیو ان سینما ٹی فلم نشان تننگ آن بیدس کامیڈی نا پروگرام و چُناتے کن تھیٹر ہم جوڑ کننگک۔ ڈرائیو ان سینما نا ٹکٹ 23 آن 100ڈا لر اٹ دوئی مریک وخت اس کہ اسہ کار اٹ چار آن زیات بندغ نا بننگ نا موکل اف۔ یات سلے کہ داکان مست امریکہ، یورپ و متحدہ عرب امارات اٹ ہم پُوسکن ءُ ڈرائیو ان سینما ملنگانے انتئے کہ عام انگا سینما تا جاگہ غا دُن انگا سینما تیٹی راجی مُری تے اسہ وڑ توننگک۔