حکومت باکسنگ نا گوازی تون ماتُنہ نا وڑاٹ پیش بننگ اٹی ءِ‘کرنل ناصر اعجاز

اسلام آباد (مانیٹرنگ ڈیسک) پاکستان باکسنگ فیڈریشن نا سیکرٹری جنرل کرنل ریٹائرڈ ناصر اعجاز تنگ پارینے کہ حکومت باکسنگ فیڈریشن ءِ سالانہ گرانٹ آن اسہ کُنڈ کرسا باکسنگ نا گوازی تون ماتنہ نا وڑاٹ پیش بننگ اٹی ءِ، تدوک آ دے میڈیا تون ہیت وگپ کرسا او پارینے کہ ملک اٹ باکسنگ نا بے کچ ٹیلنٹ ساڑی ءِ او آسراتیک مفننگ نا سوب آن دا ٹیلنٹ ہم زیان مریک۔ دا ٹیلنٹ ءِ مون آ اتنگ کن پاکستان باکسنگ فیڈریشن کیہی سال تاسے تینا کمک اٹ گام گیج کننگ اٹی ءِ۔ مستی او پارینے کہ ہچ ءُ گوازی اس حکومت و اسپانسر آتیان بیدس شون ہلنگ کپک۔ او پارینے کہ ملکی تاریخ اٹ پاکستان باکسنگ نا گواچی ٹی 1948ءآن اینو اسکان 223 میڈل دوئی کرینے۔ اوفتے ٹی اولمپک گیمک، جہانی مقابلہ غاک، کامن ویلتھ گیمک، ایشین گیمک و ساﺅتھ ایشین گیم تیان بیدس بے کچ جہانی ایونٹس آتا میڈل آک اوار ءُ، ولدا ہم پاکستان باکسنگ فیڈریشن ءِ گرانٹ آن اسہ کنڈ کننگ گوازی گر و آفیشل تتون بےدادی اسے۔ کرنل ناصر تنگ وزیر اعظم عمران خان و بنجائی وزیر بین الصوبائی رابطہ ڈاکٹر فہمیدہ مرزا آن خواست کرے کہ حکومت ایلو اسپورٹس فیڈریشن نا وڑاٹ پاکستان باکسنگ فیڈریشن ءِ ہم فنڈ جاری کے تانکہ جہانی کہول آ ملک انا پن ءِ روشن کروک آ گوازی گرتیٹی ودی مروک آ بے چینی ایسر مرے۔