دین آن بچفنگ و کمک کن ہر شاری اسکان سر مرینہ، آرمی چیف

اسلام آباد (مانیٹرنگ ڈیسک) آرمی چیف جنرل قمر جاوید باجوہ پارینے کہجہانی دین کورونا غان بچفنگ و خواری نا دا ساہت اٹی کمک کن ہر شاری اسکان سر مرینہ۔ سرجم حوال آتا رد اٹ آرمی چیف نیشنل کمانڈ اینڈ آپریشنل سینٹر اٹی تروک بریفنگ نا اٹ بشخ ہلک، ہراٹی کورونا وائرس نا مون ئ، توننگکن ہرفنگوک گام گیج آتیا سرجمی اٹ معلومداری تننگا۔ دا وخت آ آرمی چیف جنرل قمر جاوید باجوہ پارے کہ الس نا رکھ اکن غٹ المی گام گیج آتے کننگک۔ نن اسہ فکری تپہ اسے ہم دا دین اٹ تنیا الیپنہ۔ او پارے کہ پاک فوج نا ورناک ملک انا کنج کنج اسکان شاری تسکان مسنو۔ دین آن بچفنگ و خواری نا دا ساہت اٹی کمک کن ہر شاری اسکان سر مرینہ۔ آرمی چیف پارے کہ قومی کوشست آتا کمک اٹ دا گڑتی تا مون ءِ توننگ مریک۔ پک کروک گام گیج آک وخت آ کننگار، تو مچ آ راج رکھنگک۔ گڑا ننے رنگ و نسل انا پرخ آن ایڑتر اسہ قوم اس جوڑ مرسا دا دین اتون جنگ تروئی تمک۔ آرمی چیف جنرل قمر جاوید پارے کہ الس آن کس اسے ہم دین انا دُو تیا اِلنگ کپنہ۔ و نئے دُن کینہ۔