بنجائی حکومت نا لاک ڈاﺅن ءِ 14 اپریل اسکان برجا تخنگ نا فیصلہ
بنجا و غٹ صوبہ غاتتون سلاہ غان پد فیصلہ کرین، کہ لاک ڈاﺅن ءِ اِرا ہفتہ پین مچ آ ملک اٹ برجا تخنگک، قومی رابطہ کمیٹی نا دیوان اٹی آرمی چیف و ایلو کمامدار آک ہم ساڑی ئسر، اسد عمر نا دیوان آن پد بریفنگ
اسلام آباد (مانیٹرنگ ڈیسک) بنجائی حکومت کورونا دین ءِ توننگ کن صوبہ غاتا کنڈ آن نافذ کروک لاک ڈاﺅن نا مُد اٹ اِرا پین ہفتہ ودکی کرینے، ہراڑان پد 14 اپریل اسکان لاک ڈاﺅن برجا سلک۔ وزیراعظم عمران خان نا کماشی ٹی کورونا وائرس نا حالیت نا جاچ ءِ ہلنگ کن قومی رابطہ کمیٹی (این سی سی) نا دیوان مس، ہراٹی آرمی چیف جنرل قمر جاوید باجوہ تون اوار ایلو کل کمامدار آک ساڑی ئسر۔ دیوان اٹی کورونا وائرس نا سوب آن ملک انا ساڑی حالیت نا جاچ ءِ ہلنگا، و کیہی اہم ءُ فیصلہ کننگا۔ دیوان آن پد پریس کانفرنس کرسا بنجائی وزیر ڈت بندی اسد عمر پارے کہ بنجائی حکومت 2 ہفتہ پین لاک ڈاﺅن ءِ برجا تخنگ نا فیصلہ کرینے۔ او پارے کہ بنجا و غٹ صوبہ غاتتون سلابت آن پد فیصلہ کننگا کہ لاک ڈاﺅن ءِ 2 ہفتہ پین ودفنگے۔ و اینو اسیجائی وڑ اٹ فیصلہ مس کہ یکم آن 14 اپریل اسکان سڑی حالیت برجا سلک۔ اسد عمر نا پاننگ ئس کہ 14 اپریل آن مست قومی رابطہ کمیٹی نا دوارہ میٹنگ مریک، ہراٹی فیصلہ کینہ کہ لاک ڈاﺅن ءِ کم کننگے یا ودفنگے۔ ولے دا نیام اٹ ہمو صنعت و سروس آک ہرا بنداوی گرج آتتون گنڈوک ءُ، یلہ مریرہ۔ او پارے کہ کنوئی گڑا، دارو درمان نا صنعت آتے ملنگ نا گرج ءِ۔ وخت اس کہ گڈز ٹرانسپورٹ آ ہچ ءُ رکھ اس مفک۔ بنجائی وزیر پارے کہ داسہ غٹ فریق آک باور کرفینو کہ این سی سی نا فیصلہ غا عملدرآمد ءِ پک کننگک، ولے 4 اپریل آن پیشن ملک آن اسہ جہاز اس اسلام آباد آ بریک، ہرانا غٹ مسافر تے ایئرپورٹ آ کرنٹائن اٹ تخنگک، و ٹیسٹ کننگک۔ و منفی بننگ آن پد اوفتے اِلنگک۔ اسد عمر پارے کہ مست پیشن ملک آن بروک آتا سوب آن کورونا تالان مس۔ پیشن ملک آن اسلام آباد آ بروک جہاز آتا مسافر تے شار انا ایلو علاقہ غاتیا راہی کننگ نا انتظام کرینن۔ اونا پاننگ ئس کہ ملکی جہاز آتا ہن بر داسکان ہندن بند سلک۔ اگہ اسکان نن آزموندہ و ڈیٹا تیا فیصلہ کرین تو گچین فیصلہ کننگ کینہ۔ داسہ ہرا لاک ڈاﺅن کننگا، داڑان کیس آتا کچ اٹ کمتی بسنے۔ اگہ لاک ڈاﺅن متوکہ تو کورونا نا کیس آک داکان کیہی ہنداخس زیات مسرہ۔ گڑا پین لاک ڈاﺅن اٹ پین سختی اتنگ نا گرج متنے۔ دا وخت آ وزیراعظم عمران خان نا خصوصی جانجوڑی کمکار ڈاکٹر ظفر مرزا پارے کہ غاو بسنے کہ منہ پبلک پرائیویٹ سیکٹر اسے نا دفتر اٹی بائیو میٹرک مشین نا کمک اٹ حاضری خلنگ ءُ، او پارے کہ لاک ڈاﺅن آ پین عمل کرین تو حالیت اٹ گچینی بننگ کیک۔ دا وخت آ وزیراعظم عمران خان نا خصوصی قومی سلامتی ڈویژن کمکار ڈاکٹر معید یوسف پارے کہ مسٹ آن 11 اپریل اسکان پی آئی اے نا کمک اٹ 17 جہاز چلینگرہ، ہرافتا کمک اٹ 2 ہزار نا کچ مسافر پاکستان آ اتنگرہ۔ او پارے کہ برطانیہ، کینیڈا، ترکی، باکو و کوالالپمور نا خصوصی جہاز آک پاکستان آ بریرہ۔