بنجائی، صوبائی حکومت آک و سخیک سختی نا دے تیٹی مون آ بریر، ملک ابرار

کوئٹہ(اے پی پی) سیاسی و راجی راہشون ملک ابرار پارینے کہ کوروناوائرس آن خلوئی اف بلکن ننے یکجا مرسا داڑتون جنگ تروئی مریک، الس کوروناوائرس نا تالانی ءِ توننگ کن تینا اُراتیٹی مریر ، بنجائی، صوبائی حکومت آک و سخیک سختی نا دا دے تیٹی نیزگار و حقدار بندغ آتا کمک ءِ کننگ کن مون آ بریر تانکہ ہچ ءُ بھلو انسانی المیہ اس ودی مننگ کپ۔ داہیت ءِ او سے شنبے نادے آ کوئٹہ ٹی نیزگار وحقدار بندغ آتے ٹی راشن بشخنگ نا وخت آ گپ وتران کرساپارے۔ اوپارے کہ داوخت آ کوروناوائرس مچ آ دنیا ءِ تینا پلویڑ اٹی ہلکونے ہراڑآن ہزار آ بندغ آک زوال و لکھ آتا کچ اٹی زہمی مسنو، بلوچستان تون اوار مچ آ ملک اٹی کوروناوائرس نا تالانی ءِ توننگ کن حکومت لاک ڈاﺅن کرینے ہرانا سوب دیہاڑی دار و ہڑدے اجرت آ کاریم کروک آ مزورو نیزگار بندغ آک بھاز بے وڑ زہمی مننگ ءُ ہرافتا کمک ءِ کننگ ننا اخلاقی و اسلامی زمواری ءِ۔ اوپارے کہ ننے کوروناوائرس آن خلوئی اف بلکن یکجا مرسا دانامقابلہ ءِ کروئی ءِ و رکھی گام گیج آتیا عملدرآمد کرسا نن دانامون ءِ توننگ کینہ شاری تے مرے کہ اواُراتیٹی مریر و بے سوب اُراتیان پیش تمنگ آن پاناد کیر۔ اوپارے کہ بنجائی و صوبائی حکومت آک ومخیر خواجہ غاک سختی نا دا دے تیٹی نیزگار و حقدار بندغ آتا کمک ءِ کننگ کن مون آ بریر تانکہ اسہ بندغ اس ہم بین آن زوال کپ۔ ملک ابرار داوخت آ نیزگار و حقدار بندغ آتے ٹی کنوئی آ گڑا و نت بشخا۔