قومی اسمبلی ٹی ناموس صحابہ کانود نا منظوری ستا کڑزک، مذہبی راہشون

نوشکے : اسلام نا مقدس آ بندغ آک خاص کر خلفا راشدین اہل بیت و حضرات صحابہ کرام نا عزت و ناموس نا رکھ اکن کانود سازی وخت انا گرج ءِ۔ قومی اسمبلی آن ناموس صحابہ کانود نا اکثریت اٹ منظوری جوان ءِ۔ اومیت ءِ کہ سینیٹ نا باسک آک ہم تینا قومی و مذہبی ذمہ داری تے محسوس کرسا ناموس صحابہ نا کانود ءِ سینٹ آن ہم اکثریت اٹ پاس کیرہ۔ صحابہ کرام و اہل بیت ہر مسلمان کن معیار حق ءِ۔ پاکستان نا 75 درسد اُلس نا خواست ءِ کہ مقدس آ بندغ آتا عزت و ناموس ءِ کانودی رکھ تننگے۔ دا خیال آتا درشانی ءِ نوشکے پریس کلب اٹ مذہبی جماعت آک جمعیت علماء اسلام جماعت اسلامی‘جمعیت علما اسلام نظریاتی و سنی علماء کونسل نا راہشونک حاجی منظور احمد مینگل حافظ مطیع الرحمان مینگل مفتی فدا الرحمن ریکی حافظ محمد قاسم فاروقی حافظ عبداللہ گورگیج حافظ محمد ابراہیم الحسینی مولانا ذکریا عادل اسک پریس کانفرنس آن تران کرسا پاریر کہ قومی اسمبلی آن ناموس صحابہ نا رکھ اکن کانود ءِ پاس کننگ آ بنجائی اسمبلی نا باسک آتیان خاص کر مولانا عبدالحق چترالی ڈپٹی اسپیکر قومی اسمبلی ذائد اکرم درانی مولانا اسد محمود مولانا مفتی عبدالشکور خراج تحسین نا حقدار ءُ۔ اوفک پاریر کہ حضرات صحابہ کرام رضوان اللہ علیہم اجمعین حضور نبی اکرم ص تون دین اسلام ہیل کرسا مچ آ دنیا نا انسان تسکان سر مس۔ اسلام نا حقانیت نا گواہ ہم حضرات صحابہ کرام رضوان اللہ علیہم اجمعین ءِ۔ اگہ ہچ ءُ بندغ اس حضرات صحابہ کرام آتے پدی کننگ نا کوشست کرے تو او اسلام ءِ پد کننگ اٹی ءِ۔ پاکستان اسٹ انگا اسلامی ملک ءِ ہرادے اسلام نا مقدس پن آ دوئی کرینے۔ اسلام نا پن آ آجو مروک آ ملک اٹ اسلام نا مقدس آ بندغ آتا ناموس ءِ کانود ءِ رکھ تننگ ریاست نا زمواری ءِ۔

(آن لائن)