زرگزران شونداری نا کسر آ روان مسنے

اسلام آباد(آن لائن) بنجائی وزیر حوالکاری و شینکاری سینیٹر شبلی فراز پارینے کہ پیپلزپارٹی والا ٹین پرسنٹ آن بڑز انا سوچنگ کننگ کپنہ، پِر تیان نسخان تا خرچہ تے خلنگ کن کمیٹی اس تشکیل تننگانے، وزیراعظم برمتہ مروک آ ڈائریکٹر ایس ای سی پی ساجد گوندل نا زوت اس یلہ کرفنگ نا پارت کرینے، بنجائی کابینہ مچ آ ملک اٹ پناہ گاہ تا کچ اٹ ودکی، ایم ڈی بیت المال عون عباس نا مدت ملازمت اٹ ودکی و مسافر بردار بحری جہاز آتا منظوری تس۔ تدوک آ دے بنجائی کابینہ نا دیوان آن پد میڈیا ءِ بریفنگ ترسا بنجائی وزیر حوالکاری و شینکاری شبلی فراز پارینے کہ دیوان اٹ سندھ انا تہہ انا بابت اٹ ہیت مسنے۔ ڈاکٹر فہمیدہ مرزا پِر تیان زہمی سندھ انا تہہ انا حالیت آن معلومدار کرے۔ خیبرپختونخواہ اٹ پِر تیان زیات نسخان متنے۔ بدقسمتی اٹ سندھ انا حالیت آک ملک انا ایلو علاقہ غاتیان بھاز خراب ءِ۔ اُلس پِر آن ودی مروک آ ویل آتا پلویڑ اٹی ءِ۔ نسخان تا خرچہ کن کابینہ خاص ءُ کمیٹی اس تشکیل تسنے ہرا سندھ انا تہہ اٹ پِر تیان نسخان تا بابت رپورٹ بنجائی کابینہ ءِ پیش کیک۔ بنجائی حکومت سندھ انا تہہ اٹ گچین آ نمائندہ غاتا سلاہ غان ہر ممکن کمک کیک۔ شبلی فراز شعبہ صحافت تون گنڈوک آ بندغ آتا ویل آتا بابت اٹ ہیت کرسا پارے کہ میڈیا ہاؤس آتا کم از کم 1.1ارب روپئی نا بقایاجات ادا کننگانے۔