براہوئی ادبی حوال

عبدالقیوم بیدارؔ

0

Get real time updates directly on you device, subscribe now.

ہراتم آن مُچ آ جہان اٹ کورونا نا بیماری بس تو مُچ آ مخلوق اسہ ایلو آن مُر تما۔ مخلوق نا مُچی غم و بیماری ٹی اسہ ایلو نا حال پُرسی، اسکول، ہسپتال، سانگ و برام، جلسہ جلوس نا مُچیک ایسر مسُر۔ دانا اثر جہانی ادب آ ہم تما، مشاعرہ، مذاکرہ، سیمینار آک تینا اُرا ٹی تُولوک سوشل میڈیا نا کمک اٹ مننگ بنا کریر۔ دا رداٹ منہ دے مُست اکادمی ادبیات پاکستان نا بست و بند اٹ براہوئی ادب اٹی وطن دوستی نا سرحال آ مذاکرہ اسے نا بست و بند کننگا۔ دا مذاکرہ زُوم کانفرنسنگ نا رد اٹ پیش کننگا۔ دا مذاکرہ نا کماشی ءِ تربت یونیورسٹی کیچ انا وائس چانسلر پروفیسر ڈاکٹر عبدالرزاق صابرؔ کرے و خاص انگا مہمان براہوئی اکیڈمی نا کماش ڈاکٹر ایم صلاح الدین مینگل ئس۔ دا مذاکرہ ٹی اکادمی ادبیات نا ریجنل ڈائریکٹر افضل مرادؔ، پنی آ دانشور، ادیب شاعر نور خان محمد حسنی، چیئرمین براہوئی ادبی سوسائٹی عبدالقیوم بیدارؔ تران کریر۔ اکادمی ادبیات نا اسسٹنٹ ڈائریکٹر میر نواز سولنگی دا کانفرنس نا بست و بند ءِ کرے، چیئرمین اکادمی ادبیات ڈاکٹر یوسف خُشک مہمان تے بخیر کرے۔

نور خان محمد حسنی و عبدالقیوم بیدار تران کرسا پاریر کہ آجوئی آن مُست بلوچستان نا خطہ سندھ و پنجاب آن جتا ئسکہ۔ برصغیر نا ایلو علاقہ غاتیٹی انگریز و ہندوک مسلمان تیا زوراکی کریرہ، ولے بلوچستان اٹ انگریز آتا براہ راست بادشاہی الّو۔ داڑے خان قلات نا ریاست ئسکہ۔ خان مہراب خان نا شہادت آن پد انگریز آتا دا خطہ ٹی اثر و رسوخ مس۔ ہراتم انگریز آک بلوچستان آ جلہو کریر تو دا جاگہ نا مخلوق اوفتا خلاف بش مس و انگریز آتتون جنگ کرے۔ اوفتا دا بہادری و انگریز آتا زوراکی نا برخلاف براہوئی شاعرک وطن دوستی نا شاعری تے پارسا انگریز آتا بد انگا کاریم و سازش آتا برخلاف تینا شاعری نا رد اٹ مزاحمت ءِ مون آ ایسُر و تینا ورنا تے بیدار کریر۔ دُنکہ براہوئی زبان نا پنی آ کلاسک شاعر ریکی پاہک۔

اینو ننے دے دیگر ءِ

پگہ نوا وار اس برے

براہوئی شاعری ٹی وطن دوستی نا درشانی اسہ زیبا ءُ وڑ اسیٹ ساڑی ءِ۔ ننا خلقی شاعری مرے یا کلاسیکل ادب، اوٹی وطن دوستی نا اسہ خاص ءُ وڑ و دروشم اس خننگک۔ خلقی شاعری ٹی وطن نا مش و جبل، اونا ندارہ، مخلوق نا زند و بود، دا جاگہ نا رسم و دود، موسم آتا رنگ آک، تینا محبوبہ نا سفت و ستا و حلال آ ساہدار تتون دوستی نا درشانی مریک۔ کلاسیکل شاعرک کہ اوٹی بشام، ریکی و قیصر خان اوار ءُ، تینا تاریخی آ واقعہ و وطن کن جنگ کروک آ مجاہد آتا سفت و ستا کِن شئیر پارینو۔ انگریز آتا برخلاف جنگ کروک آ وطن نا دا مجاہد آتیٹی نورا مینگل، شہباز گرگناڑی، میر مہراب خان، خان جان زرک زئی، نواب خان محمد زہری، نور الدین مینگل، سردار رسول بشخ ساسولی، مزار خان باجوئی، غازی سلیمان و ایلو چندی مجاہد آک اوار ءُ۔ داڑان بیدس مُلا مزار نا پنی آ نظم ”لاٹ انا بگّی“ براہوئی شاعری ٹی مزاحمت نا بھلو نشان اسے۔ اوفک پاریر کہ جدید براہوئی ادب نا بِنا سال 1950ء آن گُڈ مریک ہراٹی پنی آ براہوئی نوشتکار آتا وطن دوستی نا حوالہ ٹی نوشت و شاعریک خننگرہ۔ ہرافتے ٹی بابو عبدالرحمٰن کُرد، پروفیسر نادر قمبرانی، پیرل زبیرانی، امیرالمُلک مینگل، ڈاکٹر سلیم کُرد، شاہ بیگ شیدا، منظور بلوچ، شمش ندیم، قیوم بیدارؔ، افضل مراد، نور خان نوابؔ، پروفیسر ڈاکٹرعبدالرزاق صابرؔ، رحیم ناز و ایلو شاعرک وطن دوستی نا حوالہ ٹی تینا شعری کوشست آتے مون آ ایسنو۔

دا وخت آ ڈاکٹر عبدالرزاق صابر تران کرسا پارے کہ براہوئی ادب اٹی وطن دوستی اسہ بے مٹ ءُ مڈی اسے۔ کلاسیکل شاعر تیان ہلیس اینو نا شاعر اسکان دافک کُل وطن دوستی نا جوزہ ٹی زیبا ءُ شاعری کرینو۔  جدید شاعری ٹی تاج محمد تاجل، نادر قمبرانی، منظور بلوچ، شمس ندیم، و ایلوشاعر ک وطن دوستی نا رد اٹ تینا شاعری ءِ مون آ ایسنو۔ براہوئی شاعری و ادب تون اوار کُل پاکستانی زبان تا ایلو زبان تیٹی ترجمہ غاتیان نن اسہ ایلو آن بھاز خُڑک بننگ کینہ۔

ڈاکٹر یوسف خُشک چیئرمین اکادمی ادبیات پاکستان پارے کہ کُل زبان تیانبار براہوئی شاعری ٹی ہم وطن دوستی نا کلام آک مِلرہ، ولے اوفتا ترجمہ غاک بھاز کم مسنو۔ براہوئی قلم نا خواجہ غاک ہم تینا وطن نا شان اٹی شاعری کننگ آن کس اسے آن پد افّس۔

مہمان خاص ڈاکٹر ایم صلاح الدین مینگل پارے کہ براہوئی زبان و ادب وطن نا مہر آن ٹِل و پُل ءِ۔ دا ہیت انا گُرج ءِ کہ دا شاعری نا ایلو زبان تیٹی ترجمہ کننگے۔ تاکہ مُچ آ مُلک اٹی براہوئی ادب اٹی ساڑی وطن تون مہر انا دا سوچ و فکر کُل مخلوق اسکان سر مرے۔

ہفتئی تلار

22-28 August 2020

تاک: 33

پنہ : 4

Get real time updates directly on you device, subscribe now.

Leave A Reply

Your email address will not be published.