ڈسٹرکٹ ہیلتھ آفیسر گوادر نا آر ایچ سی پسنی و بی ایچ یو بسول نا دورہ، طبی آسراتی تا جاچ

وزیراعلیٰ بلوچستان میر سرفراز بگٹی نا وژن نا رِد اٹ مچ آ صوبہ ٹی جانجوڑی نا بشخ نا جوانی، بنداوی طبی آسراتی تا ودفنگ و شاری آتے معیاری درمان اوفتا درگہ غا فراوان کننگ کن حکومتِ بلوچستان بھرمی گام گیج کننگ اٹی اے۔ ہندا چرجوئی ٹی ڈسٹرکٹ ہیلتھ آفیسر گوادر ڈاکٹر یاسر طاہر رورل ہیلتھ سینٹر (آر ایچ سی) پسنی و بنائی مرکزِ جانجوڑی (بی ایچ یو) بسول نا سرجم ءُ دورہ اسے کرے، دورہ نا وخت آ ڈسٹرکٹ ہیلتھ آفیسر او پی ڈی، ہلہلہ ئی بشخ، دارو تا کوڑی، صفائی نا حالیت، طبی ازباب، عملہ نا حاضری و ناجوڑ آتے تننگوک آ طبی آسراتی تا جم جاچ ءِ ہلک۔ او ہسپتال آتیٹی برجا طبی خذمت آتا معائنہ ءِ کرسا متعلقہ عملہ ءِ الس ءِ وخت آ، معیاری و جوان آ وڑ و ڈول اٹ درمان نا آسراتی تا فراوانی نا پارت کرے. ڈاکٹر یاسر طاہر طبی عملہ تون اوڑدہی نا وخت آ ہسپتال آتے پیش بروک آ ویل آتا، دارو تا دستیابی، ہلہلہ ئی آسراتی و جم کارکرد آ سرجم بریفنگ ہلک و متعلقہ کمامدار آتے السی خذمت نا آب ءِ پین جوان کننگ کن المی آ گام گیج آتے پک کننگ نا پارت کرے۔