صحبت پور، مانجھوٹی واہ ٹی شگاف آن نوکاپی حالیت، السی کمک کن ہلہلہ ئی گام گیج

مانجھوٹی شاخ اٹی ہلہلہ ئی وڑ اٹ شگاف تمنگ نا سوب آن نوکاپی دیر ترندی اٹ خڑکی آبادی آتیٹی پترینگا، ہراڑآن کیہی خلق آک دیر انا جھل آ بسور و اُرا تے نسخان رسینگا۔ دیر اُرا تیٹی پترینگنگ نا سوب آن الس ءِ تینا نہادی گڑا و مال مولی تے رکھی ہند آتیا گدریفنگ اٹی بھلو خواری اس مون تروئی تما، وخت اس کہ کیہی خاہوت آک تینا ہنکین آتے یلہ کرسا ہورک آ آسمان نا جھل آ یا رکھی ہند آتا کنڈ آ ہننگ آ بیوس مسور۔ دا ہلہلہ ئی حالیت علاقہ نا ہڑدے ئی زند ءِ بھاز خراب زہمی کرے و زہمی آتے دمدستی کمک نا اشد گرج ئس، حالیت نا سنگینی ءِ مون آ تخسا ڈپٹی کمشنر صحبت پور فریدہ ترین نا خاص آ پارت آ ضلعی انتظامیہ دمدستی وڑ اٹ ہلہلہ ؤ بنداو آ ریسکیو و ریلیف آپریشن نا بناءِ کرے۔ انتظامیہ، لیویز فورس و ایلو متعلقہ ادارہ غاتا ٹیم آک دمدستی وڑ اٹ زہمی علاقہ غاتیٹی سرمسور و الس ءِ رکھی ہند آتیا گدریفنگ نا عمل نا بناءِ کریر۔ بے اُرا خاہوت آتیکن عارضی رہائش کن خیمہ ہنکینیک ٹہیفنگانو، ہراڑے زہمی آتے سفا انگا دیر، خشک راشن، تیار خوراک، طبی آسراتی و ایلو بنداوی گرج آک فراوان کننگ انگ اٹی ءُ۔