حکومت جانجوڑی آسراتی تے کن گام گیج کننگ ءِ، دوستین جمالدینی

کوئٹہ (تلار حوالکار) سیکرٹری جانجوڑی بلوچستان دوستین خان جمالدینی پارینے کہ صوبائی حکومت الس ءِ جانجوڑی نا آسراتی فراوان کننگ کن غٹ دوئی وسیلہ غاتے کاریم اٹ اتنگ اٹی ءِ، ٹی بی کنٹرول پروگرام بلوچستان اٹ ٹی بی نا تشخیص وناجوڑ آتے درمان نا جوان آسراتی فراوان کننگ اٹی ءِ‘ فاطمہ جناح چیسٹ اینڈ جنرل ہسپتال اٹ پوسکن آ آسراتی تیان شُپ پراونشل ریفرینس لیبارٹری آن ٹی بی و کورونا وائرس ناناجوڑ آتا ٹیسٹ اٹ کمک رسینگک۔ داہیت آتے او یک شنبے نادے فاطمہ جناح چیسٹ اینڈ جنرل ہسپتال اٹ ٹی بی کنٹرول پروگرام ناکنڈآن جوڑ کروک پراونشل ریفرنس لیبارٹری نا دورہ نا وخت آ صحافی تتون ہیت وگپ کرسا کرے۔دا وخت آ صوبائی ٹی بی کنٹرول پروگرام نا منیجر ڈاکٹر احمد ولی و سینئر لاء آفیسر ہدایت اللہ خان ہم ساڑی ئس۔ صوبائی ٹی بی کنٹرول پروگرام نا منیجر ڈاکٹر احمد ولی سیکرٹری جانجوڑی ءِٹی بی پروگرام لیبارٹری ٹی فراوان کروک آسراتی‘ انفراسٹرکچر و ازباب آتابابت بریفنگ تس وپارے کہ صوبائی ٹی بی کنٹرول پروگرام صوبہ ٹی ٹی بی نا ناجوڑ آتے ہر وڑ انا آسراتی فراوان کننگ کن غٹ دوئی وسیلہ غاتے کاریم اٹ اتنگ نا پرمان کرینے۔ سیکرٹری جانجوڑی بلوچستان دوستین خان جمالدینی لیبارٹری ٹی ساڑی آسراتی تا ستاءِ کرسا پارے کہ دا وڑ انا پوسکن آ آسراتی تیان شُپ لیبارٹری نا مننگ آن صوبہ ٹی ٹی بی نا ناجوڑآتا تشخیصی ٹیسٹ اٹ کمک رسینگ وخت اس کہ دا لیبارٹری کورونا وائرس نا ٹیسٹ کننگ کن ہم کاریم اٹ اتنگ مریک۔ او پارے کہ وزیراعلیٰ بلوچستان جام کمال خان و صوبائی حکومت الس ءِ درمان نا جوان آسراتی فراوان کننگ کن غٹ دوئی وسیلہ غاتے کاریم اٹ اتنگ اٹی ءُ۔ برجا مالی سال انا بجٹ اٹ محکمہ جانجوڑی کن بھلو پیسہ اس جتا کننگانے ہراڑان ہسپتال آتے ٹی آسراتی تا فراوانی ٹی کمک رسینگک۔ او پارے کہ ٹی بی کنٹرول پروگرام صوبہ ٹی ٹی بی نا تشخیص و ناجوڑ آتا درمان کن مفت آسراتی فراوان کننگ اٹی ءِ۔