پدتموک علاقہ غاتے ٹی شونداری کاریم تیا عملی گام گیج مننگ اٹی ءِ‘میر سرفراز بگٹی

سوئی، وزیراعلیٰ بلوچستان میر سرفراز بگٹی سوئی آ سر مس، ہراڑے او قبائلی متبر‘ راہشون تتون اوڑدہی کرے‘ و روایتی بلوچی حال احوال کرے۔ دا وخت آ الس نا بھلو کچ اس ہم ساڑی ئس، ہرافک وزیراعلیٰ ءِ تینا ویل و مشکل آتیان معلومدار کریر۔ داوخت آ گپ وتران کرسا وزیراعلیٰ بلوچستان میر سرفراز بگٹی پارے کہ صوبائی حکومت پدتموک علاقہ غاتے شونداری نا کسر آ اتنگ کن عملی گام گیج کننگ اٹی ءِ‘ بلوچستان نا ہمو انگا علاقہ غاک ہم اریر ہراڑے پاکستان جوڑ مننگ آن داتم اسکان شونداری کاریم متنے ولے داسہ دا علاقہ غاتیٹی بنداوی آسراتی تا فراوانی و شونداری ڈٹ آتیا چکار کننگ انگ ءِ‘ وزیراعلیٰ پارے کہ تعلیم نا بشخ آ خصوصی چکار کننگ انگ ءِ‘ انتئے کہ تعلیم شوندری و شونہالی نا بنداو ءِ‘ خاص وڑ اٹ مسن تا تعلیم آ چکار کننگ المی ءِ تاکہ اوفتے تعلیم نا بریبر وارخواہیک فراوان کننگے و او اسہ خوانندہ ءُ راج اسے نا جوڑ کننگ اٹ تینا کڑد ءِ ادا کننگ کیر۔ میر سرفراز بگٹی پارے کہ سوئی ماسٹر پلان نا رد اٹ شونداری ڈٹ آتیا عملدرآمد برجا ءِ‘ ہرافتا مسخت علاقہ ٹی بنداوی آسراتی تا فراوانی، شونداری عمل ءِ مستی دننگ و الس نا زند ءِ آب اٹ کننگ ءِ‘ او پارے کہ صوبائی حکومت شونداری عمل ءِ ہمو علاقہ غاتسکان تالان تننگ نا کوشست اٹی ءِ ہرافک مستین گوجالنگانو تاکہ ہمو جاگہ نا الس ہم تعلیم، بنداوی آسراتی و شونداری نا بھرم تیان فائدہ دوئی کننگ کیر۔ وزیراعلیٰ بلوچستان دا ارادگی نا درشانی ءِ کرے کہ السی ویل آتا ایسری و پدتموک علاقہ غاتا شونداری کن گام گیج آتا ریسہ ءِ برجا تخنگک۔