صوبہ نا ورنا تے مونی ہننگ، تعلیم و روزگار نا وارخواہی فراوان کننگ ننا اولیت آتیٹی اوار ہے، جعفرخان مندوخیل

کوئٹہ، گورنر بلوچستان جعفرخان مندوخیل پارینے کہ صوبہ نا ورناتے مونی ہننگ، تعلیم آن شُپ کننگ و روزگار نا وارخواہی فراوان کننگ ننا اولیت آتیٹی اوار ءِ تاکہ او قومی دنگ اٹ اوار مرسا ملک و صوبہ نا تعمیر و شونداری ٹی پورو کڑد ادا کننگ کیر۔ پاکستان ننے خوشی و عزت تسنے‘ نن تینا قائد میاں محمد نواز شریف نا وژن و مشن نا رِد اٹ مونیٓ ہننگ اُن و صوبہ نا الس نا آسودہی و اوفتا ویل آتا ایسری آ خصوصی چکار کننگ اُن۔ دا خیال آتا درشانی ءِ او پروگریسیو کلائمیٹ فاؤنڈیشن و پاکستان مسلم لیگ (ن) یوتھ ونگ نا کنڈآن اڈ تروک دود آن تران کرسا کرے۔ داوخت آ صوبائی وزیر میر عاصم کرد گیلو، قومی اسمبلی نا باسک اختر بی بی، صوبائی اسمبلی نا باسک زرک خان مندوخیل، وزیراعظم یوتھ پروگرام بلوچستان نا فوکل پرسن سجاد رئیسانی، یونس بلوچ، چوہدری شبیر و عبدالوہاب اتل اچکزئی ہم ساڑی ئس۔ دود آن تران کرسا گورنر بلوچستان جعفرخان مندوخیل پارے کہ ورناک ملک اسے نا نہادی مڈی و روشنا آخبت نا ضمانت ءُ۔ گرج دا ہیت انا ءِ کہ اوفتے تینا لائخی تا درشانی، عملی ہیلکاری و مونی ہننگ کن گچین چاگڑد فراوان کننگے‘ ورناتے روزگار نا گچین وارخواہی فراوان کننگ و اوفتے آب اٹو تعلیم تننگ کناو اقوام متحدہ نا ہیڈ کوارٹر اٹی بھی توار چست کرینے۔