پاکستان و بنگلہ دیش ءِ تین پہ تینی آزموندہ غاتیان فائدہ ہرفنگ نا گرج ءِ،نائب وزیراعظم محمد اسحاق ڈار
بنگلہ دیشی طالب علم آتے کن تعلیمی وظیفہ تننگ انگ ءِ، پروگرام آن تین پہ تینی ایلمی تعلقداری پین مونی کاہک
اسلام آباد، نائب وزیراعظم و وزیرخارجہ سینیٹر محمد اسحاق ڈار پاکستان و بنگلہ دیش نا نیام اٹ تعلیمی اصلاحات، موسمیاتی بدلی و ایلو بشخ آتیٹی تین پہ تینی آزموندہ غاتیان فائدہ ہرفنگ نا گرج آ زور شاغسا پارینے کہ خیال و سوچ آتا ہل/ و تس ہڑتوم آ ملک آتیکن فائدہ ئی جوڑ مننگ کیک۔ داخیال آتا درشانی ءِ او چارشنبے نادے دفترخارجہ ٹی بنگلہ دیش نا 35 سینئر سرکاری افسر آتا ڈل آتیان تران کرسا کرے۔ ڈل پاکستان بنگلہ دیش نالج کوریڈور نا رداٹ نیشنل اسکول آف پبلک پالیسی نا ایگزیکٹو ڈویلپمنٹ انسٹی ٹیوٹ نا کنڈآن ایگزیکٹو لیڈر شپ ٹریننگ پروگرام اٹی بشخ ہلنگ ءِ۔ نائب وزیراعظم ڈل ءِ جم وجوش اٹ بخیرکرسا پاکستان و بنگلہ دیش نا نیام اٹ سنگتی نا متکن آ رشتہ و اسیجائی دودوربیدہ ئی قدر آتیا ہیت کرے۔ اوپارے کہ پاکستان بنگلہ دیش کن نیک است خواہی تخک، بنگلہ دیشی ڈل انا دورہ غان ہڑتوم آملک آتے اسہ ایلو آن ہیل کننگ نا وارخواہی دو بریک۔ نائب وزیراعظم ہڑتوم آ ملک آتا ہڑتوم آ کنڈآتا تعلقداری ٹی مثبت پیشرفت نا ستاءِ کرسا تین پہ تینی شرف، پت و خیرخواہی نا جوزہ غاتا رداٹ تعلقداری تے پین سوگو جوڑ کننگ نا پاکستان نا ارادگی نا درشانی ءِ کرے۔ اوپارے کہ تعلیم، کسبی ہیلکاری و ادارہ ئی رابطہ غاتا مونی دننگ اٹ نالج کوریڈور نا کڑد بھاز اہم ءِ۔ اواومیت درشان کرے کہ دا پروگرام حکمرانی نا وڑ و السی انتظام نا بشخ آتیٹی آزموندہ غاتا ہل و تس اٹی کمکار جوڑ و ہڑتوم آملک آتا نیام اٹ آخبتی کسبی رابطہ و سنگتیتعلقداری تے ہم مونی دیک۔ نائب وزیراعظم پارے کہ پاکستان بنگلہ دیشی طالب علم آتے کن تعلیمی وظیفہ ہم تننگ ءِ۔ او ڈل انا باسک آتے کن پاکستان اٹ اڈکننگ ءِ بھرمی، خوشگوار و یاتگار جوڑ کننگ کن نیک است خواہی تا ہم درشانی ءِ کرے۔