بنائی چنکی نا آب اٹ تعلیم روشنا آخبت نا بنداو ءِ، احسن اقبال

اسلام آباد، بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ بنائی چنکی نا آب اٹ و پوسکن تعلیم چناتا ذہنی و تخلیقی لائخی تے مونی اتنگ اٹ بنداوی کڑد ادا کیک، اینو نا چناک پگہ نا پاکستان نا روشنا آخبت نا جوڑ کروک جوڑ مریرہ۔ جمعہ نادے آ ایکس آ آئی ایم سی جی گولڑہ کیمپس نا دورہ نا وخت آ چناتتون ہیت وگپ کرسا ویڈیو ءِ شیئر کرسا بنجائی وزیر پارے کہ چنکا چناتا ذہانت، تجسس، ساف است و بھلو تغ خننگ نا لائخی پاکستان نا روشنا آخبت نا اومیت ترفک۔ اوچناتتون رنگ، چندی شکل و ٹیڈی بیئرز نا نا سرحال آتیا گپ وتران کرے و اوفتا است خواہی و ذہانت نا جاچ ءِ ہلک‘ احسن اقبال پارے کہ حکومت بنائی چنکی نا آب اٹ تعلیم آ خاص چکار کننگ ءِ تانکہ چناتا لائخی تے بنائی وئی آن مونی اتنگ مرے و اوفتے ہیل کننگ، سجفنگ و تخلیقی لائخی تا درشانی نا گچین وارخواہی فراوان کننگ مرے۔ اوپارے کہ چناتا تعلیم و ہیلکاری ٹی استخواہی و سرجز آتیا تالان خوانفنگ وڑوڈول آتے مونی دننگ المی ءِ تانکہ او پت، ذہانت و مثبت سوچ اتون مونی ہِننگ کیر۔ بنجائی وزیر دا ارادگی نا درشانی ءِ کرے کہ چناتے آب اٹ تعلیمی چاگڑد و گچین وارخواہی فراوان کرسا اوفتے آخبت نا لائخ، تخلیقی و زموار شاری اس جوڑ کننگ کن کوشست آتے برجا تخنگک۔