چنکا ڈیوالئیک خن تا ویل آتا سوب مننگ کیرہ، ڈی سی اوستامحمد

اوستامحمد، ڈپٹی کمشنر اوستامحمد محمد رمضان پلال تحصیل ہیڈکوارٹر ہسپتال اوستامحمد اٹی اڈ ہلوک فری آئی میڈیکل کیمپ انا باقاعدہ بناءِ کرے دا وخت آ ڈسٹرکٹ ہیلتھ افسر ڈاکٹر امیر علی جمالی، محکمہ جانجوڑی نا ایلو افسر، طبی کارندہ و تعلقدار کمامدار آک ہم ساڑی ئسر۔ بنانا وخت آ ڈپٹی کمشنر کیمپ انا جتا بشخ آتا جاچ ءِ ہلک و ہموڑے فراوان کروک طبی آسراتی تا بابت تعلقدار کمامدار آتیاں معلومداری دوئی کرے۔ دا وخت آ ہیت وگپ کرسا ڈپٹی کمشنر محمد رمضان پلال پارے کہ خنک اللہ تعالیٰ نا عطا کروک اسہ عظیم و بے مٹ ءُ نعمت اسے ءُ ہرافتا حقی قدر و اہمیت ءِ ہمو بندغ آتیان ارفنگ مریک ہرافک خننگ کون آ نعمت آن محروم ءُ۔ خننگ انسان نا ہڑدے ئی زند نا اسہ بنداوی بشخ اسے، ہندا سوب آن خن تا جانجوڑی نا خیال تخنگ‘ ناجوڑی تا وخت آ تشخیص و جوان درمان بھاز المی ءِ۔ چنکا ڈیوالئی بھاز وخت خن تا بھلا ویل آتا سوب مننگ کیک، ہندا سوب آن الس بایدے خن تتون تعلقدار ہر وڑ انا تکلیف نا وخت آ مستند طبی چاہندار آتیا کاہے۔