صوبائی حکومت زرکارآتے رکھوک چاگڑد فراوان کننگ کن سنبرینگوک ءِ،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ بلوچستان اٹی زرکاری نا مونی دننگ کن حکومت صوبہ نا الس نا کمک اٹ زرکارآتے رکھی چاگڑد اس فراوان کننگ کن سنبرینگوک ءِ۔ بلوچستان بیرہ قدرتی وسیلہ غاتیان شپ اف بلکن داجاگہ نا الس مہمانداری، رواداری و تینا قول آتا پاسداری نا اسہ شانی ءُ روایت اس تخرہ۔ ریکوڈک ڈٹ اتون گنڈوک بیرک کمپنی نا پدی ہِننگ نا وخت اسہ دہائی آن زیات وخت اسکان خورک رہینگوک آ اونا کیمپ آن اسہ ٹی شرٹ یا چاہ انا کوپ اسکان غیب متویسس، دا بلوچستان نا الس نا کڑد و دودوربیدہ نا پیدوار درور ءِ۔ حکومت معدنی راہداری تون اوار مچ آ صوبہ ٹی زرکارآتے پورو سیکورٹی، ون ونڈو آپریشن و کل المی آسراتی فراوان کیک، وخت اس کہ ریڈ ٹیپ ازم انا ہچ ءُ گنجائشت اس مفک۔ داخیال آتا درشانی ءِ او پنچ شنبے نادے آ پاکستان منرلز انویسٹمنٹ فورم 2026 نا دود آن تران کرسا کرے۔ وزیراعلیٰ بلوچستان پارے کہ ریکوڈک نا بابت سوج آتا ورندی ءِ تننگ آن مست او دنیا ءِ بلوچستان نا الس و اوفتا دودوربیدہ نا بارواٹی اسہ زیبا ءُ کِسہ اس پاننگ خواہک۔ اوپارے کہ ہراتم بیرک کمپنی منہ سال مست ریکوڈک ڈٹ جتا مس تو اسہ دہائی آن زیات وخت اسکان اونا کیمپ خورک ئس و ہموڑے ہچ ءُ سیکورٹی گارڈ اس تعینات الوکہ، ولے ہراتم کمپنی دہ سال آن پد پدی بس تو کیمپ آن اسہ ٹی شرٹ اسکان دُزی متویسس و نئے چاہ انا اسہ کوپ اس غیب ئس۔ اوپارے کہ ہندا بلوچستان ءِ و ہندا داجاگہ نا الس نا روایت، دودوربیدہ و مہمانداری نا حقی ڈیک ءِ۔ میر سرفراز بگٹی پارے کہ ہراتم زرکاری و سیکورٹی نا ہیت مریک تو کل آن مست الس اہمیت تخک۔ بلوچستان نا الس ملکی و جہانی شریدار آتا ستاءِ کیک و خواہک کہ زرکار آک صوبہ غا بریر و داڑے دوئی وارخواہی تیان فائدہ ہرفر۔ حکومت نا پالیسی ہم ہندادے کہ ہندی آبادی تون اوار مرسا اوفتا است و ذہن ءِ کٹسا زرکار و شریداری کن اسہ رکھ و گچین چاگڑد اس جوڑ کننگے۔ اوپارے کہ امن و ایمنی کن بنجائی و صوبائی حکومت آک پورو وڑاٹ سنبرینگوک ءُ وخت اس کہ سیکورٹی ادارہ غاتتون درکار لائخی و کچ ساڑی ءِ۔ معدنی راہداری نا رکھ اکن اسہ جتا سیکورٹی ڈویژن اس جوڑ کننگانے وخت اس کہ فرنٹیئر کور انا پوسکن آ ونگءِ ہم جوڑ کننگ انگ ءِ تانکہ مچ آ صوبہ خاص وڑ اٹ معدنی راہداری ٹی زرکارآتے پورو سیکورٹی فراوان کننگ مرے۔ وزیراعلیٰ پارے کہ اونا خڑک بلوچستان اٹی زرکاری نا بابت اصل چیلنج سیکورٹی آن زیات صوبہ نا بارواٹ مروک آ منفی تاثر و ڈغاری راستی تا نیام اٹ فرق ءِ، انتئے کہ منفی تاثر مدام راستکی تا مون اٹ زیات ترندی اٹ تالان مریک۔ بلوچستان نا بارواٹ میڈیا غا نشان تروک آ ندارہ غاک مچ آ صوبہ نا حقی ڈیک ءِ پیش کپسہ۔ بلوچستان اسہ جتا ءُ ڈیہہ اسے، داجاگہ نا الس زرکارآتے بخیر کیک و خواہک کہ ملکی و درملکی زرکارآک صوبہ نا شونداری ٹی تینا کڑد ءِ ادا کیر۔ میر سرفراز بگٹی ملکی و جہانی زرکارآتے باوری کرفے کہ صوبائی حکومت اوفتا رکھ و زرکاری کن گچین چاگڑد فراوان کننگ نا زمواری ءِ پورو کیک۔