بنجائی حکومت خیبرپختونخوا ٹی ڈیجیٹلائزیشن کن کمک فراوان کیک،شزہ فاطمہ خواجہ

اسلام آباد، گورنر ہاؤس پشاور اٹی ڈیجیٹل ماسٹر پلان و نیشنل ڈیجیٹل کمیشن نا بابت اسہ اہم دیوان اس اڈ ہلک، ہرانا اسیجائی کماشی ءِ گورنر خیبرپختونخوافیصل کریم کنڈی و بنجائی وزیر انفارمیشن ٹیکنالوجی شزہ فاطمہ خواجہ اسک کریر۔ وزارت آئی ٹی آن جاری بیان اٹی پاننگاکہ نیشنل ڈیجیٹل کمیشن اٹی ہر چار آ صوبہ غاتے نمائندگی تننگانے، وخت اس کہ بنجائی حکومت نا بست وبند اٹی مچ آملک اٹی فعال 500 ڈیجیٹل پلیٹ فارم آتیان 150 خیبرپختونخوا ٹی کاریم کننگ ءُ۔ داوخت آ ہیت وگپ کرسا بنجائی وزیر آئی ٹی شزہ فاطمہ خواجہ پارے کہ بنجائی حکومت خیبرپختونخوا ٹی ڈیجیٹلائزیشن و آئی ٹی انفراسٹرکچر نا شونداری کن پورو کمک فراوان کیک۔ اوپارے کہ وزیراعظم پاکستان نا ’ڈیجیٹل پاکستان وژن‘ نا رداٹ کل صوبہ غاتے اسہ بنجائی ڈیجیٹل انفراسٹرکچر اسے تون گنڈنگ انگ ءِ، ہرانا کمک اٹ ون ونڈو سسٹم نا رداٹ الس ءِ زرگزرانی، راجی واقتصادی آسراتی دُوبریک۔ بنجائی وزیرپارے کہ ڈیجیٹل سکلز پروگرام نا رداٹ داتم اسکان خیبرپختونخوا نا 8 لکھ ورناتے ہیلکاری فراوان کننگانے، وخت اس کہ داسہ صوبہ نا ورناتے آرٹیفیشل انٹیلی جنس (اے آئی)، پوسکن آ ڈیجیٹل ٹیکنالوجی و سمال بزنس اسٹارٹ اپس نا بابت خصوصی ہیلکاری تننگک۔ او پارے کہ ورناو زالبول آتے اُراٹی تولوک آن لائن روزگار نا وارخواہی فراوان کننگ حکومت نا اولیت آتیٹی اوار ءِ۔ گورنر خیبرپختونخوا فیصل کریم کنڈی وزیراعظم پاکستان و بنجائی وزارت آئی ٹی نا ڈیجیٹل گام گیج آتا ستاءِ کرسا پارے کہ دا ڈٹ صوبہ نا ورناتے زرگزرانی وڑاٹ وتواجہ جوڑ کننگ اٹ اہم کڑد ادا کیک۔ اوباوری کرفے کہ صوبائی حکومت بنجانا ڈیجیٹل گام گیج و اصلاحات کن وس انا کچ آ کمکاری ءِ برجا تخک۔ اوکان گڈ، بنجائی وزیر آئی ٹی شزہ فاطمہ خواجہ پشاور اٹی نیشنل انکیوبیشن سینٹر خیبرپختونخوا نا دورہ ءِ ہم کرے، ہراڑے او ہیلکاری دوئی کروک ورناتتون اوڑدہی کرے۔ بنجائی وزیر ورنا تا اسٹاٹ اپس و پوسکن آ تکنیکی ڈٹ آتا جاچ ءِ ہلک و اوفتا تخلیقی کوشت آتا ستاءِ کرے۔