موسمیاتی آفت آتتون مون تننگ کن جہانی یکجہتی ءِ عملی گام گیج آتیٹی بدل کروئی تمک،وزیراعظم محمد شہباز شریف

انطالیہ، وزیراعظم محمد شہباز شریف کرہ ارض آ زند انا رکھ و موسمیاتی بدلی تا زہم تتون مون تننگ کن اسیجائی جہانی زمواری نا اہمیت آ ہیت کرسا پارینے کہ موسمیاتی آفت آتتون مون تننگ کن گچین و انصاف اٹ گام گیج آتتون اوار اوار جہانی یکجہتی ءِ عملی گام گیج آتیٹی بدل کروئی مریک، ویل آتا گواچی زرگزران تیکن سرکاری و پرائیویٹ بشخ انا شریداری تون اوار گرانٹ آ تالان مالی کمک و موسمیاتی لچک وموافقت نا فنڈ آتیٹی نمان ودکی نا گرج ءِ۔ پاکستان چاگڑد دوست عملی گام گیج آتا کمک اٹ درور اس پک کننگ اٹی ءِ، دِیر ءِ وخت اس کہ سلہہ نا وڑاٹ بایدے کاریم اٹ اتنگپ، و آبی معاہدہ غا اوفتا حقی روح انا رداٹ عملدرآمد المی ءِ۔ داخیال آتا درشانی ءِ او ترکیہ نا شار انطالیہ ٹی اقوام متحدہ نا موسمیاتی بدلی کانفرنس (کوپ 31) نا سروکی دیوان اٹی قومی بیان پیش کرساکرے۔ وزیراعظم 2025 اٹی پاکستان نا ضلع بونیر اٹی بروک آ بھسکار نوکاپ نا ذکر ءِ کرسا پارے کہ اسہ ورناسے نا مچ آ خلق اونا برام آن بیرہ اِرا دے مست نوکاپی دِیر انا گواچی مس و برام نا تیاری تیٹی اختہ اُرا ماتن اٹی بدل مس۔ اوپارے کہ منہ دے آن پد او زہمی خاہوت آتتون اوڑدہی کرے ہرا تینا اُرا، روزگار و سنگت آتے گوہاسر، داڈکھیائی او خاہوت آتا جندی المیہ ئس ولے اونا پد اٹ ساڑی خطرہ نا چیدہ مچ آ دنیاکن اسہ انتباہ اس ئس۔ اوپارے کہ دا پاکستان تون اوار پدتموک دنیا نا کروڑ آ مخلوق نا کِسہ ءِ ہرافتا موسمیاتی بدلی تیٹی بشخ کل آن کم ءِ ولے اونا نسخانی نتیجہ غاتے اوفتے سگوئی تمنگ ءِ۔ وزیراعظم 2022 نا بھسکار نوکاپ نا حوالہ ءِ ترسا پارے کہ داوخت آ پاکستان نا اسہ چارک اسے دِیر ہرفیسس، 3 کروڑ 30 لکھ بندغ زہمی مسر، 1،700 ان زیات بندغ زوال کریر وخت اس کہ زرگزرانی نسخانک 30 ارب ڈالر آن گدرینگاسر۔ اویات کرفے کہ چار سال مست اقوام متحدہ ٹی او خبڑدار کریسس کہ پاکستان اٹ مونی بروک آ واقعہ غاک پاکستان اسکان سلپسہ۔ بدبختی اٹ دا انتباہ داسہ راستی جوڑ مسنے و ہرا آخبت نا گڑتی درشان کننگاسس، او اینو ننا زند انا بشخ ءِ۔ اوپارے کہ موسمیاتی بدلی تا زہمک سیم تا پابند افس و اسہ ملک اس ہم تنیا اوفتتون مون تننگ کپک، ہنداسوب آن جہانی یکجہتی نا مطلب عملی گام گیج مرے۔ وزیراعظم 2010 و 2022 نا بھسکار نوکاپ آتیٹی پاکستان تون تفنگ آ ترک صدر رجب طیب اردوان، اول گودی امینہ اردوان و ترک الس نا خصوصی منت واری ءِ ہرفسا پارے کہ اوفتا سنگتی و یکجہتی مدام پاکستانی الس نا است آتیٹی زندہ سلک۔ اوپارے کہ انطالیہ راہی مننگ آن مست او چشمہ فائیو نیو کلیئر پاور پلانٹ نا ”ڈوم پلیسمنٹ“ نا دود اٹی بشخ ہلک ہرا فعال مننگ آن پد 1200 میگاواٹ ساف و کاربن نا اخراج آن پاک بجلی ودی کیک۔ اوپارے کہ پاکستان عملی درور اس جوڑ کرسا کماشی ءِ کننگ ءِ و بیرہ اِرا سال اٹ ملک اٹی ترسیلی شمسی توانائی نا لائخی ٹی 20 گیگاواٹ آن زیات ودکی کننگانے۔ وزیراعظم پارے کہ پاکستان نا توانائی نا جم وڑ تے ٹی ساف توانائی نا بشخ داسہ کم و ود 55 درسد مسنے۔ ملک اٹی برقی ہن وبر ءِ مونی دننگ انگ ءِ وخت اس کہ 2035 اسکان کاربن اخراج اٹی 50 درسد اسکان کمتی اتنگ نا ہدف پک کننگانے۔ اوپیدوار کرے کہ قومی کہول آ کروک آ کوشست آک انصاف اٹ جہانی ردعمل نا بدل گیگ مننگ کپسہ۔