حکومت اسلامی مالیاتی مارکیٹ ءِ پین ودفنگ کن سنبرینگوک ءِ،بنجائی وزیر خزانہ سینیٹر محمد اورنگزیب

اسلام آباد، بنجائی وزیر خزانہ و بنگکاری سینیٹر محمد اورنگزیب پارینے کہ حکومت اسلامی مالیاتی مارکیٹ ءِ کڑمب‘ وڑ پہ وڑی و زیات فعال جوڑ کننگ کن سنبرینگوک ءِ،اسلامی مالیاتی مارکیٹ و اسلامی سکوک نا بشخ اٹی پین پیشرفت کن حکومت، پرائیویٹ بشخ، مالیاتی ادارہ، بینک و ریگولیٹر آتے اواری اٹ کاریم کروئی تمک، ملک اٹی اسکوک نا جاری کننگ نا کچ 2026 ء ٹی ودسا 4.4 ہزار ارب روپئی اسکان سرمسنے۔ اوداہیت ءِ پنچ شنبے نادے آ ساورن اسکوک نا جاری کننگ نا کمک اٹ 10 ٹریلین روپئی نا دوئی کننگ نا تاریخی سرسہبی نا بابت اڈ ہلوک دود آن تران کرساپارے۔ وزیرخزانہ پارے کہ دا اسہ ستاکڑزوک پیشرفت اسے کہ ملک اٹی اسکوک نا جاری کننگ 10 ہزار ارب روپئی نا جم کچ آن گدرینگانے‘ اسکوک نا جاری کننگ نا کچ 2026ء ٹی 4.4 ہزار ارب روپئی اسکان سرمسنے وخت اس کہ تدوک آ سال دا کم و ود 2 ہزار ارب روپئی ئس، ہندا وڑ سالانہ بنداو تیا داٹی 113 درسد ودکی ریکارڈ کننگانے اگہ پنچ سال مست انا حساب وکتاب نا جاچ ءِ ہلنگے تو ہمو وخت اسکوک نا جاری کننگ کم و ود 761 ارب روپئی ئس، ہندا وڑ تدوک آ پنچ سال اٹی دا بشخ انا سالانہ ردوم کچ کم و ود 22 درسد رہینگانے۔ وزیرخزانہ پارے کہ دا پیشرفت نا اہمیت بیرہ اسکوک نا جاری کننگ نا جم کچ اسکان اف بلکن دامارکیٹ ءِ وڑ پہ وڑی جوڑ کننگ، پوسکن آ مالیاتی ازباب درستی راستی کرفنگ و زیات لچکدار نظام اس جوڑ کننگ کن کروک آ کوشست آک ہم ستاکڑزرہ۔ اوپارے کہ وزارت خزانہ و ڈیٹ مینجمنٹ آفس اسٹیٹ بینک انا کمک اٹ ہائبرڈ گورنمنٹ اسکوک درستی راستی کرفنگ کن اہم پیشرفت کرینے دا نظام نا رداٹ چندی شرعی اصول آتتون مطابقت تخوک آ مالیاتی پنجرآتے اوار کننگانے، ہراڑان سرکاری ملکیتی میرات آتا کاریم اٹ اتنگ اٹی زیات لچک ودی مسنے۔