ویکسی نیشن آن سلوک آ چنا تیکن بھرمی گام گیج آتے پک کننگے،محمد رمضان پلال

اوستامحمد، ڈپٹی کمشنر نا کماشی ٹی ای پی آئی پروگرام نا جاچ دیوان اڈ ہلک، دیوان اٹی رکھی ٹیکہ غاتا کوریج ءِ گچین جوڑ کننگ و ویکسی نیشن آن سلوک آ چناتیکن رسینگ گیگ ءِ پک کننگ کن اہم فیصلہ کننگا۔ حوال نارد اٹ ڈپٹی کمشنر اوستامحمد محمد رمضان پلال نا کماشی ٹی ای پی آئی پروگرام نا کارکڑدگی نا جاچ ہلنگ نا بابت اسہ اہم ءُ دیوان اس اڈ ہلک ہراٹی ڈسٹرکٹ ہیلتھ آفیسر ڈاکٹر امیر علی جمالی، ڈپٹی ڈسٹرکٹ ہیلتھ آفیسر ڈاکٹر کرار، این اسٹاپ نا ڈاکٹر خرم و ضلع مچ نا کل ویکسینیٹر آک بشخ ہلکر۔ دیوان اٹی مچ آ ضلع ٹی رکھی ٹیکہ غاتا پروگرام نا جم کارکڑد‘ پک کروک ہدف آتا دوئی کننگ و چناتے ناجوڑی تیاں رکھوک تخنگ کن برجا ویکسی نیشن سرجز آتا جم جاچ ءِ ہلنگا۔ دا وخت آ زیرو ڈوز چناتا نشاندہی و اوفتے رکھی ٹیکہ غاتا فراوانی، نومبر 2026ء نا SNID مہم اٹی اوار چناتا ویکسی نیشن نا پیشرفت و مہم اٹ دوئی مفروک چناتے دوارہ پٹسا اوفتے ویکسین خلنگ نا باندات آ خصوصی چکار کننگا۔ دیوان اٹی ایم آر ون و پینٹا تھری ویکسین نا کوریج ءِ کم آن کم 80 درسد اسکان پک کننگ آ خصوصی زور شاغنگا۔ ڈپٹی کمشنر پارت کرے کہ ہرا علاقہ و یونین کونسل آتیٹی رکھی ٹیکہ غاتا کچ پک ہدف تیاں کم ءِ، اوڑے خصوصی چکار کننگے و ویکسی نیشن آن محروم زیرو ڈوز و ڈراپ آؤٹ چناتا پورو نشاندہی کرسا اوفتے رکھی ٹیکہ غاتا دنگ اٹی اتنگ کن بھرمی گام گیج کننگے‘ دیوان اٹی ویکسی نیشن آن نمن مروک لمہ باوہ غاتا کیس تے ایسر کننگ کن یونین کونسل و تحصیل نا کہول آ خصوصی ٹیم جوڑ کننگ نا فیصلہ ہم کننگا ہرافک لمہ باوہ غاتتون حوال کرسا اوفتے چناتا وخت آ ویکسی نیشن نا اہمیت و ہلوک ناجوڑی تیاں بچفنگ نا رد اٹ معلومداری فراوان کیرہ تاکہ لمہ باوہ غاتا گڑتی تے ایسر کرسا اوفتا پت دوئی کننگ مرے۔ داکان بیدس ہرا یونین کونسل آتیٹی ایم آر ون و پینٹا تھری نا کوریج 80 درسد آن کم مسنے اوفتا کارکڑد ءِ گچین کننگ کن المی ایڈوائزری جاری کننگا۔ تعلقدار ویکسینیٹر آتے پارت کننگا کہ او تینا تینا علاقہ غاتیٹی ویکسی نیشن نا پیشرفت نا باقاعدگی اٹ جاچ ءِ ہلیر، سلوک آ چناتا ڈیٹا ءِ جوڑ کیر و اوفتسکان رسینگ گیگ اکن فیلڈ سرجز آتے پین بھرمی جوڑ کیر۔