بلوچستان اٹ قوم پرست جماعت آتا سیاست نا رجحان متکن مسنے،ظہور احمد بلیدی

کوئٹہ، صوبائی وزیر ڈٹ بندی و شونداری ظہور احمد بلیدی پارینے کہ بلوچستان اٹ قوم پرست جماعت آتا سیاست نا اسہ متکن ءُ رجحان اس مسنے کہ او السی فائدہ غاتا شونداری ڈٹ آتے سیاسی مخالفت نا گواچی کرسا کرینو۔ او پارے کہ نیشنل پارٹی ہم مستین اٹ چندی شونداری ڈٹ آتا مخالفت ءِ کرسا کرینے، وخت اس کہ اوفتا حلقہ گچین کاری ٹی گیشکور ڈیم و بلیدہ ٹاؤن پروجیکٹ تون اوار ایلو شونداری اسکیم آتے جھیڑہ ئی جوڑ کننگ نا کوشست ہم ہندا وڑانا ریسہ لگک‘ صوبائی وزیر پارے کہ سینیٹر جان محمد بلیدی بایدے بے کاٹم دوبہ خلنگ و سیاسی تنقید نا جاگہ غا تینا مرغن آ سیاسی و حکومتی دور آتا کارکڑد ءِ الس نا مون آ پیش کے۔ او پارے کہ کنا حلقہ گچین کاری ٹی روڈ، تعلیمی ادارہ، ہسپتال، واٹر سپلائی اسکیم و ایلوبنداوی آسراتی تا فراوانی نا چندی شونداری ڈٹ پورو مسنے، وخت اس کہ کیہی اہم ڈٹ آتیا کاریم ترندی اٹ برجاءِ، ہرافتا بھرم دراست الس اسکان سرمننگ ءِ۔ او مستی پارے کہ داہیت بھاز است ہسونی ناسوب ءِ کہ گڑاس شونداری ڈٹ آتا تعمیراتی مشینری ءِ خاخر تننگ نا واقعہ غاتیٹی ہم قوم پرست جماعت تون تعلقدار گڑاس زموار آتا پاننگوک کمکاری نا دوبہ غاک مون آ بسنو۔ صوبائی وزیر پیدوار کرے کہ سیاسی اختلاف و تنقید ہراسٹ نا جمہوری حق ءِ، ولے السی راجی آسودہی نا ڈٹ آتے سیاسی فائدہ غاتا گواچی کننگ و الس ءِ بنداوی آسراتی تیان محروم تخنگ نا اسہ کوشست اسے ہم سرسہب مننگ کن النگپ۔ او پارے کہ حکومت بلوچستان السی شونداری، بنداوی آسراتی تا فراوانی و پسماندہ علاقہ غاتا شونہالی کن تینا شونداری ایجنڈا غا عمل درآمد ءِ برجا تخک۔